Юмалоқ-думалоқ. “Арсенал”га қарши ўйиндаги “пирогхўр” Уэйн Шоу эсингиздами?

Шоу бундан уч йил олдин Англия кубоги 1/8 финалидан ўрин олган “Арсенал”га қарши баҳсда захира ўриндиғида ўтириб, пирогни паққос туширган эди.

Бу воқеа камера обьективларидан четда қолмади ва Шоунинг «очофатлиги» ижтимоий тармоқлар орқали бутун дунёга маълуму машҳур бўлиб кетди.

Шундан кейин ҳам дарвозабоннинг клуб билан муносабати яхши эди. Бироқ унинг қонидан аниқланган допинг сабаб “Саттон Юнайтед” футболчи билан амалдаги шартномани бекор қилди.

Маълум бўлишича, британиялик букмейкерлардан бири Уэйн Шоунинг ўйин пайти енгил тамадди қилиб олиши учун 8х1 коеффициент билан “ставка”лар олган. Шоунинг дўстлари эса бу маълумотни дарвозабонга етказади ва дарвозабон ўз дўстларига пул топишда ёрдам беришга қарор қилади.

- Ҳа, дўстларим, агар ўйин пайтида пирог истеъмол қилсам, 8 баробаргача пул ишлаб олишлари мумкинлигини айтишди. Мен кун бўйи ҳеч нарса емадим, лекин ҳазил туфайли бу ишни қила олишимни айтдим. Менимча, кимдир ўша куни бойиб кетган деб ўйламайман, - дея айбини тан олади футболчи.

Ушбу ўйин инглиз футбол иерархиясида 105 поғона юқорироқ бўлган “Арсенал”нинг ғалабаси билан якунланди.

Ўйиндан бир неча соат ўтгач, Шоу энг яхши нашрларнинг топ саҳифаларидан жой олди ва эртаси куни эрталаб у Пирс Морганнинг “Хайрли тонг Британия” (Good Morning Britain) кўрсатувига таклиф этилди.

- Мен Пирс билан тезда тил топиша олдим. Дастурнинг ўша сони жуда қизиқарли бўлди: мен унга Англиядаги подвалларда ўтказиладиган лигалар ҳақида гапириб бердим ва у менга ўзининг севимли “Арсенал”и ҳақида сўзлаб берди.

Ушбу воқеадан сўнг, Уэйн Шоу Англияда шунчалик машҳур бўлиб кетдики, ижтимоий тармоқларда унинг мухлислари сон саноқсиз эди. Эксклюзив интервю олиш учун мамлакатнинг етакчи телеканаллари мухбирлари унинг уйи атрофида жам бўлишган эди.

- Ижтимоий тармоқдаларда клуб мен билан шартномани бекор қилгани ҳақида хабар пайдо бўлгач, журналистлар менинг уйимга бостириб киришмоқчи бўлишганди. Клубдан кетишим ҳақидаги расмий хабардан сўнг остонамда нақ саккиз нафар мухбир турарди.

Кейинги уч ой давомида Шоу 35 минг фунт стерлинг ишлаб топди – бу пуллар нафақат интервьюлардан балки у иштирок этган озиқ-овқат танловларию турли туман рекламалардан келиб тушган эди.

Масалан, унинг сурати “Папа Жонс” пиццериясининг афишаларидан жой олди. Уни ҳатто бошқа мамлакатларга ҳам чақиришди - Швецияда у бир нечта кўнгилочар шоуларда иштирок этади.

Шоу ҳозир 48 ёшда ва у фаст-фуд бизнесида ўз ўрнини эгаллашга ҳаракат қилмоқда:

- Ушбу воқеадан сўнг бутун бир мавсум учун оладиган маошимни бир ойда ишлаб топдим. Бироқ улар тезда сарфланиб кетди. Шунда менда ўтириб, келажак ҳақида ўйлаб олишга имконият пайдо бўлди. Натижада футболга ҳеч қандай алоқаси бўлмаган ва мени ақлдан оздирадиган фаст-фуд бизнесини юритишга қарор қилдим.

Уэйн ўзининг она шаҳри Тоттонда кичик бир кафе очади ва у ерда "фирменний" пироглар, хот-доглар ва турли хил коктейллар савдоси билан шуғулланади Сўнгги пайтларда 48 ёшли Шоунинг ишлари юришиб кетади ва “Салмон Лип” пабини сотиб олади.

- Бу шаҳарнинг энг яхши қовоқхоналаридан бири. Мен уни сотиб олиб, ривожлантиришни орзу қилардим. Ёшим ўтиб бормоқда, менимча фаол ишлашга менда тахминан 10 йил қолди. Бу вақт давомида ўз келажагим учун пул ишлашда давом этаман. Қариялик пайтимда кимгадир зориқиб қолишни хоҳламайман.

Якуни хайрли бўлган “пирог” воқеаси у учун бир олам омад олиб келганига қарамай, Уэйн Шоу Англия кубоги доирасидаги “Арсенал”га қарши ўйиндаги “қилмиши”дан афсусда:

- Ўшанда менинг футболчилик карьерам бутунлай вайрон бўлган эди. Бўлиб ўтган воқеадан афсусдаман. Ҳеч қачон бундай ишни такрорламаган бўлардим. Менинг ўша ҳаракатларим кенг миқёсда ёйилиб кетишини кутмаган эдим.

- Мураббий Пол Досвел мен билан яхши муомалада эди. Мен уни ўттиз йилдан кўпроқ вақтдан бери танир эдим. Бироқ ўша воқеадан сўнг биз атиги икки-уч марта кўришдик холос. Чунки у мендан жудаям хафа.