Чақирманглар! Шомуродовнинг устози бу мамлакатга бормайди
Туркия Суперлигасида жорий мавсум “Истанбул Башакшеҳир” жамоасини муваффақиятли бошқарган Нури Шахиннинг фаолиятига хориж клубларидан қизиқишлар бўляпти.
Ўз даврининг машҳур футболчиси бўлган Шахин мураббийлик фаолиятида Дортмунднинг “Боруссия” жамоасини ҳам бошқаргани унга бўлган қизиқишни янада кучайтирмоқда.
Хусусан, Россия Премьер-лигаси клублари турк мураббийини нишонда ушлаб турибди. Аслида Нури Шаҳин ўтган йили кузда “Башакшеҳир”ни қабул қилиб олишдан олдин Москванинг “Динамо” клубидан ҳам бош мураббийлик бўйича таклиф олган эди. Ўшанда
Шахин ноябрь ойидаги чорловни қабул қилмаган.
Нури Шахинга бўлаётган қизиқишларга унинг манфаатларини ҳимоя қилаётган ISM Int. Soccer агентлиги муносабат билдирди.
- Ҳозирча Москванинг “Динамо” жамоаси ҳам, Россиянинг бошқа бирор клуби ҳам Нури Шахинга аниқ таклиф билан чиққани йўқ.
Айни пайтда Нури Шахин бор эътиборини “Истанбул Башакшеҳир”даги ишига қаратган. У клубдаги ҳолатидан мамнун ва жамоаси билан еврокубоклар йўлланмаси учун курашмоқда.
Айни пайтда Шахин Россияга ёки бошқа лигага ўтиш вариантини кўриб чиқмаяпти, - дейилади ISM Int. Soccer агентлиги баёнотида.
Нури Шахин қўл остида “Истанбул Башакшеҳир” Туркия чемпионатида бешинчи ўринни эгаллади ва мамлакат кубоги финали натижасини кутмоқда. Бўлажак финалда “Трабзонспор” футболчилари “Коньяспор”дан устун келса, “Башакшеҳир” янги мавсумда Еврокубокларда ўйнаш ҳуқуқини қўлга киритади.
Бундан ташқари, Нури Шахин бошқаруви остида Элдор Шомуродовнинг ўйини очилиб кетганини таъкидлаш лозим. 30 ёшли легионеримиз “Башакшеҳир” таркибида чемпионатнинг барча – 34 та учрашувида майдонга тушган ягона футболчи бўлди.
Элдор бу баҳсларда жами 22 та тўп киритиб, тўпурарлик маҳоратини намойиш қилди ва жамоасининг Суперлигадаги муваффақиятларини муносиб ҳисса қўшди.
Қолаверса, Ўзбекистон миллий терма жамоасининг яна бир вакили – Аббосбек Файзуллаев ҳам Нури Шахин жамоасининг муҳим ўйинчиларидан бирига айланган.
Фикрлар