Юрген Гёде: "Футболчилар билан бир қаторда чемпионлик учун ҳамма бирдек ишлади"

Хабарингиз бор, куни кеча Андижон шаҳридаги “Бобур Арена” ўйингоҳида Ўзбекистон чемпиони “Нефтчи” жамоаси Тошкентнинг “Пахтакор” клуби билан Суперкубок соврини учун қизғин кураш олиб борди.

Беллашувда фарғоналиклар 1:0 ҳисобида устун келиб, бош совринни қўлга киритдилар. Шу муносабат билан ўйиндан кейин “Нефтчи”да фаолият юритаётган германиялик мураббий Юрген Гёде билан клуб матбуот хизмати суҳбатлашди.

— Авваламбор Суперкубок баҳсидаги ғалаба билан табриклаймиз. Ўзбекистон сизга бегона эмас, илгари ҳам юртимизда ишлашга муяссар бўлгансиз. Айтинг-чи, жамоага мослашиш жараёни бу сафар қандай кечди?

— Табрик учун катта раҳмат. Мослашиш жараёнига келсак, афзаллик томони шундаки, клубимиздаги барча одамлар бизни бир оила аъзолари каби қўллаб-қувватлаб, ёрдам бериб келишмоқда.

— Ўзбекистондаги фаолиятингиз давомида Суперкубокдаги ғалаба биринчиси бўлди. Ҳозирда қандай ҳис-туйғуларни бошдан кечирмоқдасиз?

— Ҳиссиётларим беқиёс. Айниқса, жамоамиз кубокни Фарғонага олиб келиш жараёни ажойиб кечди. Кўчаларга хурсандчилик оғушида чиққан мухлисларнинг ҳам ажойиб қўллаб-қувватлашларига тасанно. Бунинг учун уларга катта раҳмат айтишим керак.

— Бу соврин фаолиятингиздаги энг муҳимларидан бири, десак бўладими?

— Албатта, чунки бу тарихий чемпионлик.

— Сизнингча, психологик жиҳатдан жамоани финал ҳуштагигача тайёр ҳолатда ушлаб туриш қанчалик қийин бўлди?

— Финал учрашувида ҳамма нарса бўлиши мумкин. Лекин мен жамоамга сўнгги ҳуштак чалингунига қадар ишонаман.

— Андижондаги беллашувда қайси футболчини алоҳида ажратиб кўрсатган бўлардингиз?

— Бу баҳсда футболчилар билан бир қаторда чемпионлик учун ҳамма бирдек ишлади. Масалан, шифокорлар гуруҳи, жисмоний тайёргарлик мутахассислари, администраторлар ва маъмурият жамоасини ҳам айтиб ўтиш лозим.

— Стадиондаги муҳит ва мухлислик ҳақида фикрингиз?

— Суперкубок баҳсига Андижонга ташриф буюрган ва трибуналарни тўлдирган кўп сонли фарғоналик мухлислар ва стадиондаги муҳит жуда ажойиб бўлди. Браво, “Нефтчи” Фарғона мухлислари!