"Юртингизда ўзимизни жуда қулай ҳис қиляпмиз" - Тожикистон терма жамоаси устози Ўзбекистон, Шомуродов ва Машариповни қандай таърифлади?

Юртимизда CAFA мусобақаси бошланишига оз қолди. Терма жамоалар Тошкентда тайёргарлигини олиб боришяпти. Биринчилардан бўлиб келган Тожикистон миллий термаси ҳам астойдил ҳозирлик кўряпти. Хорватиялик бош мураббийи Петр Сегрт эса мусобақа олдидан Sports.uz сайтига интервью берди.

- Терма жамоангизнинг тайёргарлиги қандай кетяпти?

- Биз Тожикистон миллий чемпионатидаги 14 нафар футболчи билан йиғинни бошлагандик. Чунки ФИФА кунлари 2 июндан бошланди ва биз буни ҳурмат қилишимиз керак. Аммо унгача клубларимиз билан маслаҳатлашган ҳолатда имкони қадар кўпроқ футболчиларни жалб қилишга ҳаракат қилдик. Бугунги кунда биз билан 21 нафар ўйинчи шуғулланмоқда. Шу ўринда Ўзбекистон Суперлига ва про лига клубларига раҳмат айтмоқчиман. Чунки улар футболчиларни Тожикистон термасига бир неча кун аввал қўйиб юборишди.

- CAFA мусобақасидан нимани кўзлаяпсиз?

- Аввало CAFA мусобақасини ўтказиш олдимиздаги муҳим турнирлар учун жуда яхши тайёргарлик вазифасини ўтаб беради. Бу Марказий Осиё давлатлари учун фойдали бўлган мусобақа. Менинг фикримча, ушбу турнирда Ўзбекистон, Уммон ва Эрон терма жамоалари фаворит мақомида иштирок этишмоқда. Тожикистон миллий терма жамоаси сифатида биз ўз имкониятимиздан тўлиқ фойдаланиб, кичик имкониятлардан максимал фойдаланишга ҳаракат қиламиз. Бу бизнинг мақсадимиз.

- Тошкентга анча барвақт келдинглар. Пойтахтдаги вақтингиз қандай ўтяпти?

- Мусобақа бўлиб ўтадиган давлатга анча эрта келиш – бу нормал ҳолат деб ҳисоблайман. Айниқса, бу гуруҳда Ўзбекистон бизнинг рақибларимиздан биттаси. Имкон қадар Тожикистон миллий терма жамоаси мураббийи сифатида футболчиларимизнинг имкониятларидан келиб чиққан ҳолатда энг яхши натижаларни қайд этишга ҳаракат қиламиз. Аммо бир нарсани айтиб ўтишим керакки, Ўзбекистонда бўлишдан жуда хурсандмиз. Чунки барча ўзбекистонлик инсонлар бизга нисбатан дўстона муносабатда бўлишади. Бу менинг Намангандан кейинги Ўзбекистонда иккинчи бор бўлишим. Ушбу маданият, ўзбек ошхонасини ва умуман, Ўзбекистонни янада яхши кўриб қоляпман. Айтиб ўтишим мумкинки, Тожикистон миллий терма жамоаси сафидаги барча аъзолари юртингизда ўзимизни жуда эркин ва қулай ҳис қиляпмиз. Ҳамма ўзбекистонликларга раҳмат. Негаки, бу даражадаги меҳмондорчилик ва кутиб олиш бизнинг ёш тожикистонлик футболчилар учун жуда ҳам муҳим. Бундан ташқари, Тожикистон терма жамоаси ходимлари ва биз мураббийлар ҳам хурсандмиз.

- Ўзбекистон терма жамоасининг асосий кучи нимада деб ўйлайсиз?

- Сизларда иқтидорларни, сифатли футболчиларни саралаб олувчи жуда яхши ва катта тажрибага эга бўлган Катанец терма жамоага мураббийлик қилади. Қолаверса, Ўзбекистонда футболчиларни ривожлантирадиган ўзига хос система мавжуд. Чунки ёшлар доимо давлатнинг келажаги бўлган ва Ўзбекистонда тасвирлаб бўлмас даражада катта ресурслар бор. Ёш ва иқтидорли ўйинчилар жуда кўп. Ўзбекистон термасининг тажрибали футболчилари билан биргаликда улар келгуси катта мусобақаларда бутун дунё учун ҳақиқий сюрприз жамоага айланиши мумкин.

- Шомуродовнинг “Специя”даги фаолиятини қандай баҳолайсиз?

- Мен фақатгина Элдор Шомуродовни жуда ҳам ажойиб ўйинчи деб айтишим мумкин.

- Роналдунинг жамоадоши – Машариповни қандай таърифлаган бўлардингиз?

- Дунёнинг исталган футболчиси учун Роналду билан жамоадош бўлиш алоҳида маъно беради ва алоҳида аҳамиятга эга. Табиийки, Жалолиддин Машарипов бундай имкониятидан хурсанд бўлиши керак. Мен 2008 йилда Грузия терма жамоаси бош мураббийи сифатида Португалияга қарши ўйин ўтказганман. Ўшанда Португалияда бош мураббий Сколари эди. Роналду ҳам бизга қарши майдонга тушган. У пайтда Криштиану ёш ҳужумчи эди. Лекин ҳамма унинг ўйинлардаги кучли сифатларини кўраётганди. Мен ҳам Роналдуни жуда ёқтирардим. Айниқса, учрашувдан олдинги у билан кичик суҳбатимиз давомида инсонийлик жиҳатдан ҳам ажойиб йигит эканини билганман. Кўпчилик футболчиларни майдондаги ҳаракатларига қараб сифатлайди. Аммо у ҳали ҳам дунёнинг энг кучли футболчиларидан бири. Бунинг сабабларидан бири эса ажойиб инсонийлиги ва ўзига хос характери деб айтиш мумкин. Мен Роналдуни яхши кўраман. У билан футболдан ташқари бироз суҳбат қурганимиз ажойиб бўлганди.

Шуҳратбек Жўраев.