"Ювентус" Россия терма жамоаси футболчисига қизиқиш билдирмоқда

Туриннинг "Ювентус" клуби Россия миллий терма жамоаси дарвозабони Станислав Агкацевга қизиқиш билдирмоқда. "Инсайды от Карпа" телеграм-канали хабарига кўра, "кекса сеньора" "Краснодар" посбони ҳақида маълумот тўплаган.

Маълум қилинишича, туринликларнинг асосий мақсади "Ливерпуль" дарвозабони Алиссонни трансфер қилиш ҳисобланади. Бироқ мерсисайдликлар бразилиялик голкипер билан хайрлашишни истамаяпти. Шу боис клуб бошқа вариантларни ҳам кўриб чиқмоқда.

24 ёшли Агкацев италияликларнинг қисқа рўйхатидан ўрин олган. Агар клуб сиёсий омилларга қарамай ушбу трансферни амалга оширишга қарор қилса, келишув қиймати 15–20 миллион еврони ташкил қилиши мумкин.

Маълумот учун, Станислав Агкацев Россия миллий терма жамоаси сафида 6 та учрашувда майдонга тушган.