Zafarmurod Abdirahmatov: "Olimpiada yo‘llanmasini qo‘lga kiritdik, ammo hali maqsadimizni oxiriga etkazmadik"

Qatar maydonlarida o‘tayotgan U23 Osiyo Kubogida O‘zbekiston terma jamoamiz xalqimizning orzusini ro‘yobga chiqargan holda shu yili Parijda o‘tadigan Olimpiada musobaqasiga yo‘llanmani qo‘lga kiritganidan xabaringiz bor. Indoneziyaga qarshi hal qiluvchi uchrashuvda futbolchilarimiz qahramonlik ko‘rsatishdi. Terma jamoamiz a’zoasi Zafarmurod Abdirahmatov ham o‘ziga bildirilgan ishonchni oqlayapti. U bir qator savollarimizga javob berdi.

- Zafarmurod, tarixiy g‘alaba bilan tabriklayman. Sizlar o‘zbek futboli tarixidan joy oldinglar. O‘yindan bir kun oldin o‘zingizni qanday his qildingiz va o‘yindan keyingi holatni qanday o‘tkazdingiz?

- Xalqimiz ko‘pdan beri intizorlik bilan kutgan Parijda o‘tadigan Olimpiada yo‘llanmasini qo‘lga kiritganimiz bilan barcha yurtdoshlarimizni tabriklaymiz. O‘yindan oldin bizda faqatgina shu maqsad bor edi. Olimpiada yo‘llanmasiga ega chiqish hamda Osiyo Kubogini O‘zbekistonga olib ketish maqsadi bilan kelgandik. Xudoga shukr, hozir bittasini uddaladik. 3 may kuni bo‘ladigan final bahsidan keyin yorug‘ yuz bilan O‘zbekistonga qaytamiz. Indoneziyaga qarshi uchrashuvdan keyin hurmatli Prezidentimizning tabrigini eshittirishdi va bu bizga juda katta motivatsiya bo‘ldi.

- Indoneziyaga qarshi birinchi bo‘limda biroz o‘xshamadi va ikkinchi bo‘limda hammasi joyiga tushdi. Raqib esa asabiylasha boshladi. Uchrashuv haqida nimalarni aytgan bo‘lardingiz?

- Birinchi bo‘lim o‘xshamadi, demagan bo‘lardim. Ko‘rgan bo‘lsangiz, ko‘plab terma jamoalar himoyaviy o‘yinga o‘tib olishgan. Bu uchrashuvning birinchi bo‘limida Indoneziya ham shunday o‘yin ko‘rsatdi. Ikkinchi bo‘limda zaxiradan maydonga tushgan o‘yinchilarimiz to‘g‘ri bo‘ldi va muhimi g‘alabaga erishdik.

- Uchrashuvdan keyin sizga birinchi bo‘lib kim tabrik yo‘lladi?

- O‘yindan keyin birinchi bo‘lib tabrik yo‘llagan bu  - mening ota-onam bo‘lishdi. Ularga katta rahmat, hissalari juda katta.

- Terma jamoamiz Olimpiadaga chiqdi va endi 3 may kuni finalda maydonga tushadi. Bunday tarixiy g‘alabadan keyin finalga tayyorgarlik qanday bo‘lyapti?

- Albatta, biz yo‘llanmani qo‘lga kiritdik. Ammo hali maqsadimizni oxiriga etkazmadik. Finalga tayyorgarlik ko‘ryapmiz. Indoneziya bilan uchrashuv yakunlanishi bilanoq Yaponiyaga qarshi bahsga hozirlikni boshlab yuborganmiz. Nasib bo‘lsa, jamoamiz finaldagi uchrashuvga munosib tayyor bo‘ladi.

- Yaponiyaning o‘yinini ko‘rdinglarmi? O‘yin penaltilar seriyasigacha borishi mumkinmi yoki...

- Ha, biz Yaponiyaning o‘yinini ko‘rganmiz. O‘zaro to‘qnash ham kelganmiz. Murabbiylarimiz etarlicha ma’lumot berishni boshlashgan. Bo‘lajak o‘yinga har tomonlama yaxshi tayyorgarlik ko‘ramiz. Iloji boricha o‘yinni penaltilar seriyasiga etkazmaslikka harakat qilamiz. Agar penaltilar seriyasi bo‘lgan taqdirda biz bunga ham tayyorgarlikni boshlab yuborganmiz.

- Olimpiada yo‘llanmasi qo‘lga kiritilgani sizni faoliyatingizda qanday burilish qiladi, deb o‘ylaysiz?

- Albatta, bu juda yoqimli. Maqsadimiz yo‘lida yangi burilish yasaymiz, degan umiddamiz. Yana bir bor xalqimizni Olimpiada yo‘llanmasiga ega chiqqanimiz bilan muborakbod etamiz. Bizni qo‘llab-quvvatlayotgan hammaga rahmat. Yana duoda bo‘lib turinglar. Xudo xohlasa, 3 may kuni Yaponiya bilan bo‘ladigan uchrashuvda sizlarning duolaringiz asqotadi.

Shuhratbek Jo‘raev.

.