Златан Иброҳимович ва Тайсон Фьюри Англия клубини сотиб олади

Бокс бўйича собиқ жаҳон чемпиони Тайсон Фьюри ва швециялик футбол юлдузи Златан Иброҳимович Англиянинг “Моркам” футбол клуби эгаларига айланиши мумкин, деб хабар бермоқда The Sun нашри.

Манба маълумотига кўра, клубни сотиб олиш ғояси икки спортчи Польшада жаҳон чемпионати билан боғлиқ реклама кампанияси устида ишлаётган вақтда учрашганидан кейин пайдо бўлган. Суҳбат давомида клубни харид қилиш ва лойиҳани ривожлантириш имкониятлари муҳокама қилинган.

Манбаларга кўра, Фьюри ва Иброҳимович жамоани сотиб олишдан ташқари Netflix учун “Моркамнинг юксалиши” деб номланиши кутилаётган ҳужжатли сериални ҳам йўлга қўйишни режалаштирмоқда.

Ушбу лойиҳа голливуд актёрлари Райан Рейнольдс ва Роб Макэлхенни сотиб олганидан кейин Англияда энг кўп муҳокама қилинган клублардан бирига айланган “Рексем” муваффақиятини такрорлаши мумкин.

Фьюрининг “Моркам” билан шахсий боғлиқлиги ҳам бор, чунки у клуб жойлашган шаҳарда яшайди ва унинг машғулот базаси жамоа стадионида жойлашган. Шунингдек, у Netflix билан “Фьюрилар хонадонида” лойиҳаси орқали ишлаш тажрибасига ҳам эга.