“Nasaf” Oliy Ligadagi 589-o‘yinini o‘tkazadi

Bugun “Nasaf” jamoasi futbol bo‘yicha XXVI O‘zbekiston chempionatidagi ilk uchrashuvini o‘tkazadi. “Ajdarlar”ning chempionatdagi dastlabki uchrashuvi o‘zbek futboli tashkil bo‘lgan ko‘hna va navqiron Qo‘qon shahri jamoasi bilan bo‘ladi.

• “Qo‘qon-1912” – “Nasaf” uchrashuvi chiptalari sotuvga chiqdi
• Yoshlar ligasi: “Nasaf” Qo‘qonda imkoniyatni boy berdi

“Nasaf” bu yil O‘zbekiston chempionatidagi 21-ishtirokini boshlaydi. Jamoaning bugungi uchrashuvi oliy ligadagi 589-o‘yini sifatida tarix sahifasidan joy oladi. “Nasaf” bosh murabbiyi Ro‘ziqul Berdiev faoliyati davomida o‘z shogirdlarini chempionatda 122-marta maydonga boshlab tushadi.

Bugungi uchrashuvni FIFA referisi, qit’amizning to‘rt karra eng yaxshi hakami – Ravshan Ermatov boshqaradi. Unga qanotlarda Abduhamidullo Rasulov va Jahongir Saidov yordam berishadi. Uchrashuvning zaxira hakami etib A. Ergashev tayinlangan. Hakamlar ishini bugun A.Abdullaev nazorat qiladi.