"Al Hilol" hujumchi uchun "Bavariya"ga 132 mln yevrogacha taklif berishga tayyor

«Al-Hilyal» klubi hujum chizig‘ini kuchaytirish maqsadida transfer bozorini faol o‘rganayotgani xabar qilinmoqda. Saudiya Arabistoni grandi Myunxenning «Bavariya» jamoasida o‘ynayotgan yarim himoyachi-vinger Luis Dias bilan muzokara olib bormoqda.

Insayder Sasha Tavolieri ijtimoiy tarmoqlarda yozishicha, «Al-Hilyal» kolumbiyalik futbolchiga soliqlardan keyin yiliga taxminan 25 million yevro maosh taklif qilishga tayyor.

Manbaga ko‘ra, hozircha saudiyaliklar «Bavariya» rahbariyati bilan rasmiy muloqot boshlamagan. Klub avval 29 yoshli futbolchining o‘zi bilan kelishuvga erishmoqchi, shundan keyingina nemis jamoasi bilan muzokaraga kirishish rejalashtirilgan.

Xabarlarda ta’kidlanishicha, «Al-Hilyal»ning yozgi transfer oynasi uchun umumiy byudjeti 350 million yevrodan oshib ketadi. Agar Luis Dias saudiya klubiga o‘tishga rozi bo‘lsa, uning transferi uchun 105 million yevrodan 132 million yevrogacha miqdorda to‘lov amalga oshirilishi mumkin.