Arteta murabbiylik faoliyatidagi navbatdagi sovrinni qo‘lga kiritdi

“Arsenal” bosh murabbiyi Mikel Arteta o‘z faoliyatidagi yana bir muhim sovrin sohibi bo‘ldi.

Londondiklar “Manchester Siti”ning 37-turda “Bornmut”ni mag‘lub eta olmaganidan keyin APL chempionligini muddatidan avval ta’minladi.

Bu Arteta uchun murabbiy sifatidagi to‘rtinchi sovrin bo‘ldi. Ispaniyalik mutaxassis ushbu sovrinlarning barchasini “Arsenal” bilan qo‘lga kiritgan.

U 2019/20 mavsumda Angliya kubogida g‘olib chiqqan, shuningdek, 2020 va 2023 yillarda Angliya Superkubogini ham yutib olgan edi.

APL chempionligi esa Arteta uchun ham murabbiy, ham futbolchi sifatidagi ilk chempionlik bo‘ldi. U o‘yinchi sifatida “Arsenal” bilan ikki marta Angliya kubogi va ikki marta Superkubokda zafar quchgan.

Eslatib o‘tamiz, Mikel Arteta “Arsenal”ni 2019 yil dekabridan buyon boshqarib kelmoqda.