“Barsa” olis Braziliyadan yangi iste’dod topdi
Skautlar yaxshi ishladi
Ispaniyaning «Barselona» klubi Braziliyaning «Atletiko Paranaense» jamoasida o‘ynaydigan 19 yoshli markaziy himoyachi Artur Diasga qiziqish bildirmoqda.
Kataloniya klubining skautlar bo‘limi rahbari Joau Amaral futbolchining o‘yinni baholash uchun Braziliya Seriya Asidagi «Baiya»ga qarshi uchrashuvni shaxsan stadionda kuzatgan. Bu haqida UmDois Esportes xabar berdi.
Manba ma’lumotiga ko‘ra, «Atletiko Paranaense» o‘tgan yozda futbolchi uchun Angliya klubidan tushgan 21 million evrolik taklifni rad etgan.
Diasga «Barselona»dan tashqari «Tottenhem», Madridning «Atletiko» klubi, «RB Leyptsig», «Nyukasl» va «Benfika» ham qiziqish bildirmoqda.
Dias «Atletiko Paranaense»ning asosiy tarkib futbolchisi hisoblanadi. U Braziliyaning 20 yoshgacha bo‘lgan yoshlar terma jamoasida o‘ynagan va yaqinda mamlakat milliy terma jamoasiga birinchi bor chaqiruv olgan.
Futbolchining klub bilan amaldagi shartnomasi 2028 yil oxirigacha mo‘ljallangan. Transfermarkt ma’lumotlariga ko‘ra, Diasning bozor qiymati 3 million evroni tashkil etadi.
Izohlar (0)