“Barsa” xo‘jayini “Real” haqida qattiq gapirdi

“Barselona” prezidenti Joan Laporta Madridning “Real” klubi tomonidan Joze Negreyra ishi bo‘yicha kataloniyaliklarga nisbatan bildirilgan ayblovlarga munosabat bildirdi.

Avvalroq «Real» UEFAga mazkur ish bo‘yicha dalillar va ko‘rsatmalarni o‘z ichiga olgan, taxminan 50 ming sahifadan iborat hujjatlar to‘plamini taqdim etgani haqida xabar berilgan edi.

- Negreyra ishiga kelsak, bizni sud jarayoni boshlanmasidanoq aybdor deb topishga urinishganini qayta-qayta aytishdan charchamayman. Vaholanki, bizni ayblash uchun asos yo‘qligi ma’lum bo‘ldi. “Barselona”ni oqilaydigan hukm chiqishiga to‘liq ishonaman.

Bu masalani tinmay ko‘tarib chiqadiganlar “Barselona”ga zarar yetkazishga va uning obro‘siga putur yetkazishga urinmoqda. Hukm chiqarilgandan keyin bu haqida gapirish uchun ham vaqt topiladi. Ular faqat “Barselona”ni obro‘sizlantirish maqsadida bu masala atrofidagi bahslarni davom ettirish uchun qo‘llaridan kelgan barcha ishni qilmoqda.

“Real” bu harakatlari bilan futbolga zarar yetkazmoqda. Ular hamma narsaga qarshi chiqadi. Siz UEFAga yoki liga rahbariyatiga murojaat qilmoqchi bo‘lsangiz ham, ular bunga qarshi chiqadi. Bu esa milliy va xalqaro miqyosda o‘z nufuzi, e’tirofi hamda obro‘sini yo‘qotib borayotgan klub haqida ko‘p narsani anglatadi.

Bunga misol sifatida EFC kongressida ishtirok etganimni aytishim mumkin. “Real” esa u yerda hatto o‘z vakili bilan ham qatnashmadi.

Ular o‘zlarini juda kibrli va hukmronlikka intiladigan tarzda tutadi. Nima qilayotganlarini yaxshi bilishadi, ammo bu xatti-harakatlar ularga nisbatan ishonchning keskin pasayishiga olib kelmoqda.

Superliga masalasida ham xuddi shunday bo‘ldi. Oxir-oqibat ular boshqalar bilan birga qoladi, ammo shu yo‘lda boshqa klublarga to‘siq qo‘yishdan to‘xtamaydi. Menimcha, bu borada o‘z xatti-harakatlarini tanqidiy baholashlari kerak edi, chunki bunday yo‘l tutish munosib emas, - deya Laportaning so‘zlarini keltiradi Sport.es.