"Biz va’da berganmiz, Superligaga chiqishimiz kerak" - "Nurafshon"ni qo‘lga olgan murabbiy qo‘rqmayapti, uning shashti baland

Oldin xabar berganimizdek, “Nurafshon” klubida Usmon Toshevning o‘rnini mahalliy murabbiy Mirislom Hasanov egalladi.

Endi u buxoroliklarga bosh murabbiylik qiladi. U bu lavozimda birinchi bor ishlamayapti. Yaqinda ham Hasanov “Nurafshon”ning bir nechta uchrashuvlarida vaqtincha bosh murabbiylik qilganini yaxshi bilamiz. O‘shanda natijalar chakki bo‘lmagan.

Xullas, buxoroliklar mavsumni Mirislom Hasanov bilan tugatib qo‘yadigan bo‘ldilar. Jamoa Superligadan hali umid uzgani yo‘q. Vaqtincha bosh murabbiy etib tayinlangan Hasanov “Nurafshon”ni elitaga olib chiqmoqchi. Bu haqda u Sports.uz muxbiri bilan suhbatda aytib o‘tdi.

- Futbolchilar professional. Bugun ular bilan gaplashib oldik, - deya gap boshladi Hasanov. - Hozirgi maqsadimiz uchinchi o‘rinni egallab pley-offda qatnashish. Biz Superligaga chiqamiz deb va’da berganmiz. Buni bajarishimiz kerak. Shunday vaziyatlar bo‘ldiki, jamoaning o‘yini chiqmadi, murabbiylar almashtirildi. Buni o‘yinchilarga ham ta’siri bo‘ladi. Kecha Usmon aka Toshev yig‘ilish o‘tkazib, meni jamoani boshqarishimni aytdi. Bugun mashg‘ulot o‘tkazdik. Endi yo‘lga chiqamiz va ertaga “Olimpik”ka qarshi o‘yin oldidan yana mashg‘ulot o‘tkazamiz. Bu jamoa uchinchi o‘rin uchun kurashda bizning asosiy raqobatchimiz. Oxirigacha harakat qilamiz. O‘yinchilarimizga ishonamiz.

- Muvaffaqiyatsiz o‘yinlardan so‘ng, futbolchilarning kayfiyati va jamoadagi muhit qanday?

- Muhit qanday? Istalgan mag‘lubiyatdan keyin muhit yaxshi bo‘lmaydi. Lekin biz barchasini yaxshilashga harakat qilamiz. Hozir “Olimpik” bilan uchrashuvga bor e’tiborni qaratganmiz, yutib olsak, keyin chempionatda tanaffus bo‘ladi. O‘sha paytda 25 kun vaqtga ega bo‘lamiz. Ammo bir-ikkita mashg‘ulot bilan ham muhitni yaxshilashga urinyapmiz.

- Nima deb o‘ylaysiz, “Nurafshon”ning to‘g‘ridan-to‘g‘ri Superligaga chiqish imkoniyati qolmadimi?

- “Neftchi” chiqib bo‘ldi va “Dinamo” ham 90 foiz Superligada. To‘rtta o‘yinimiz qolgan. Maksimal kurashamiz. O‘yinlar ham oson emas. Masalan, “Dinamo” yaxshi o‘yin ko‘rsatyapti. Ularda imkoniyat yaxshiroq, bizga qaraganda. Biz esa “Olimpik” bilan uchinchi o‘ringa kurashamiz. Bo‘lajak raqibimiz ham yaxshi jamoa.

- Mavsum avvalida “Neftchi” bilan “Nurafshon”ning Superligaga chiqishi taxmin qilingandi. Ammo buxoroliklar o‘rniga “Dinamo” bu ishni uddalayapti. Siz “Nurafshon”da ko‘p yillardan beri ishlayapsiz va hammasini ichidan bilasiz. Klubda qaysi tizim noto‘g‘ri yo‘lga qo‘yilgan?

- Asosiy maqsad Superligaga chiqish edi. Boshida Davron aka Fayzievga ishonch bildirildimi, imkoniyat berish kerak edi. Mana, Hakim Fuzaylov “Dinamo”ga keldi. Ular ham ochkolar yo‘qotdi, ammo rahbariyat murabbiyga imkoniyat berishda davom etdi. Har bir murabbiyga ishonish kerak-da. Qolaversa, bizni o‘z stadionimiz yo‘q. Ikki yildan beri maydonimiz yo‘qligidan azob chekyapmiz.

- Shuni ham so‘ramoqchi edim. Nima sababdan markaziy stadion haligacha foydalanishga topshirilmayapti?

- Maydonni tayyorlashgandi, ammo issiq havoda, quyoshda maysa kuyib ketdi. Endi boshqa mutaxassislar kelgan va boshqatdan tayyorlashyapti. Aslida bu yil ikkinchi davradan o‘z maydonimizda o‘ynashimiz kerak edi. Yana shuni ham aytmoqchiman, qiyin vaziyatlarda jamoani menga beradilar. Shu klubda ishlar ekanman, har doim yordam berishga tayyorman.

- Bungacha ham joriy mavsum avvalida ma’lum vaqt jamoani boshqardingiz va natijalar chakki bo‘lmagandi. O‘shanda rahbariyat yana ishonch bildirishlarini so‘ramaganmisiz?

- Bu erga Usmon Toshev kelishi kerak edi. Chunki rahbariyat bu murabbiy bilan gaplashib qo‘ygandi. Anvar Berdiev bosh murabbiy bo‘lib ishlayotgandi va jamoa samarqandliklarga yutqazganidan keyin Usmon Toshev menga aloqaga chiqib, klubni boshqarib turishimni aytib ishonch bildirgan. Keyin o‘zi kelib, ishni davom ettirdi.

- Toshevning ketib qolishini jamoa qanday qabul qildi? U to‘g‘ri qildimi yoki noto‘g‘rimi?

- U bizning ustozimiz. Bu savolga biror nima deb javob bera olmayman. “Neftchi” bilan o‘yinga bir kun qolganida Usmon aka meni Toshkentga chaqirishyapti, ketishim kerak dedi. Biz o‘sha o‘yin kuni Toshevning O‘FAda ish boshlaganini eshitdik. Biz ham hayron bo‘lib qoldik.

- Murabbiylar shtabida kimlar yordam beradi?

- Hozircha Suhrob Qobilov bor va tojikistonlik murabbiylar ham hali jamoada. Usmon Toshev kelganida ularni o‘zi bilan olib kelgandi.

- Vaziyatga real qaraganda, “Nurafshon”ni Superligaga qaytarishga necha foizga ishonyapsiz?

- To‘g‘risini aytaman, agar uchinchi o‘rinni olsak, keyin bitta o‘yin qoladi va biz borimizni beramiz. Bu uchrashuv o‘z maydonimizda o‘tadi. Pley-offda kim bilan o‘ynasak ham Superliganing biror klubidan qo‘rqadigan joyimiz yo‘q. Pley-offda yutib Superligaga chiqishimizga ishonaman. Va’da berganmiz.

- Tojikistonlik hujumchi Tohir Maladustov jamoadami? Nega u o‘zini ko‘rsata olmayapti?

- U shu erda. Bu futbolchida o‘yin amaliyoti etarli darajada emas. Samarqandliklar bilan o‘yinda unga imkoniyat berdik. Ammo u hali chempionatimizda o‘ynashga tayyor emas. Pro-liga bo‘lsa ham bizda yaxshi saviya bor. Lekin u tortolmayapti.