"Bularning nazdida umuman yutqazmaslik kerak" - Davron Fayzievga ishonchsizlik qaerdan paydo bo‘ldi? Ketar chog‘ida futbolchilarga nimani va’da berganini bilasizmi?

“Buxoro”da bosh murabbiy o‘zgardi, Davron Fayziev iste’foga chiqib, Anvar Berdiev uning vazifasini bajaradi.

Fayziev “Buxoro”da yanvar oyida ish boshlagandi, biroq uning bu klubdagi faoliyati uzoqqa cho‘zilmadi. Iste’foga chiqarilganidan keyin Davron Fayziev sports.uz muxbiriga intervyu berdi.

- “Buxoro”dan iste’foga chiqishingiz kutilmaganda yuz berdimi? Har xolda vaziyat bunday tus olishi biroz tushunarsiz bo‘ldi. Chunki natijalar yomon emasdi. O‘zingiz buni qanday qabul qildingiz?

- Iste’fo nima bilan bog‘liq? Rahbariyat biladi. Ular natijadan, o‘yindan qoniqmadik, deyishdi va shunday qilib, ishonchsizlik bildirishdi. Unday bo‘lsa, hamkorlikni to‘xtatamiz, dedim. Hech kimdan xafa bo‘lmadim. Murabbiy jamoani o‘zi istagandek qilib, kamida ikki yilda tayyorlashi mumkin. Natijamiz yomon emasdi. Oldimizga Superligaga chiqish vazifasi qo‘yilgandi. Pro-ligada to‘rtta o‘yin o‘tkazdik va barchasini safarda o‘ynadik. Kubokda esa “Dinamo” bilan bahs olib bordik. Rahbariyatga balki to‘g‘riso‘zligim yoqmagandir, yana bilmadim. Faqat menga nisbatan ishonchsizlik bildirilganidan keyin o‘sha paytning o‘zidayoq, agar shunday bo‘lsa, ishlay olmasligimni bildirib, do‘stona xayrlashdik.

- Aslida sizning iste’foga chiqarilishingizga qayd etilgan natijalar jiddiy sabab bo‘la olmasa kerak. Axir to‘rtta o‘yinning uchtasida g‘alaba va bittasida mag‘lubiyat kuzatildi. Kubok doirasida esa, “Dinamo” bilan durang o‘ynadinglar. Sizning “Buxoro”dan ketishingiz jarayoni to‘satdan yuz berdimi yoki hammasi yig‘ilib shunga qarab ketayotganmidi?

- To‘g‘risi, yig‘ilib kelayotgan holat edi. Masalan, “Sho‘rtan”ni yutdik. Ammo nimaga 1:0 ga yutdinglar, degan gap-so‘zlar ham bo‘ldi. “Yangier”ga nima sababdan yutqazdi, va hokazo. Hammasi birdan yuz bermaydi. Mayda-chudalashib o‘tirmadim. Murabbiy uchun ham sifat, ham natijani 3-4 oydayoq birdan amalga oshirish qiyin. Aslida qiyin joyga ketayotganimni bilardim, biroq qo‘rqmagandim. Rahbariyatning ishingizdan qoniqmayapmiz, degan gaplaridan keyin yana u erda qolib ishlashim noto‘g‘ri ham bo‘lardi. Jamoa ishonib topshirilganda hech bo‘lmaganda birinchi davra yakunlariga qarab xulosa chiqarish kerak, deb o‘ylayman. Har o‘yinda g‘alaba qozonib beraman, degan murabbiy bilan ishlashni xohlashdi. Ha, mening oldimga aniq maqsad qo‘yilgan: yil yakunida jamoa Superligaga chiqishi kerak. Futbolda mag‘lubiyat, durang va g‘alaba doim yonma-yon. Hech qaysi murabbiy har o‘yinda g‘alaba uchun kafolat bermasa kerak. Mana, “Sho‘rtan” – “Neftchi” misolida ko‘rish mumkin. Lekin yutgan o‘yiningizdan keyin ham tanbeh eshitsangiz og‘ir botadi. Murabbiyga murabbiydek, futbolchiga futbolchidek munosabatda bo‘lishlari tarafdoriman. Bu borada hurmat talab qildim.

- Bir necha oy muqaddam ham sizni “Buxoro”dan ketganingiz va o‘rningizga Anvar Berdiev olib kelingani haqida ma’lumotlar tarqalgandi. O‘sha paytda haqiqat qanday bo‘lgandi?

- O‘sha paytda ham shu narsa bo‘lgandi. O‘quv mashg‘ulot yig‘inlarida “Yangier” bilan durang o‘ynadik. “Rubin”ga yutqazdik. Qishki yig‘inda tarkib shakllantiriladi, har bir futbolchiga imkoniyat beriladi. O‘sha uchrashuvlarda ham gap-so‘zlar bo‘lgandi. Bularning nazdida umuman yutqazmaslik kerak. Bunday bosimda futbolchi ham futbol o‘ynay olmaydi, murabbiy ham ishlay olmaydi. Anvar Berdiev bilan Sergey Lebedevni taklif qilishdi. Ozgina bo‘lsa ham buxorolik muxlislarning qalbida joy ololgan bo‘lsam xursandman. Lekin menda ishonch katta edi. Bilmayman, bir necha oyda qaysi murabbiy jamoani har tomonlama kuchaytira olarkin? Hamma narsaga vaqt kerak. Barchasiga xo‘p, xo‘p deb chidab yurish menga to‘g‘ri kelmaydi yoki menga yana imkoniyat bering, jamoada qolay, deb aytish ham o‘zimga xos emas. Ishonch bildirishmadimi, tamom hech qanday xafagarchilik yo‘q. Agar ishonch bo‘lsa, oxirigacha bo‘lishi kerak.

- O‘sha paytda Anvar Berdiev o‘rningizga olib kelingandi-a?

- Balki shuni istashgandir, u yog‘i menga qorong‘u. Qanday reja qilishganini bilmayman. Ularni olib kelishgach, biror nimadan xavotirlanganim yo‘q. Mayli, rahbariyat birga ishlashimizni istagan bo‘lsa, qarshilik ko‘rsatmayman, deb aytganman.

- Iste’foingizni futbolchilar qanday qabul qildi?

- Yigitlarga tushuntirdim, vaziyatni. “Buxoro” Superligaga albatta chiqadi. Bu ishni uddalashganida futbolchilarga bayram dasturxonida birga qatnashishga va’da berdim. Faqat jamoani qo‘llab-quvvatlash kerak. Yutqazganda yoki durang o‘ynaganda ham yolg‘izlatib qo‘ymaslik lozim. Qo‘llab-quvvatlash ishonchga kiradi. E’tibor bersangiz, oxirgi paytlarda hamma narsaga bitta murabbiy balogardon bo‘lib qolyapti. “Buxoro”ga muxlislik qilaman va jamoani qo‘llab-quvvatlayman. Qilgan mehnatimni bilaman. Umuman aytganda, klubdagi barcha kim qanday mehnat qilayotganini biladi. Anvar Berdievga omad tilayman. Tayyor jamoa, kurashish va yutish kerak.

- Klubga kelgan chog‘ingizda rahbarlar bilan kelishuv qanday bo‘lgan?

- Jamoani Superligaga qaytarish vazifasi qo‘yilgan. Yil yakunida “Buxoro”ni elitaga olib chiqaman, deb aytganman. Lekin hamma o‘yinda 100 foiz yutaman, deb aytmaganman. O‘yin-o‘yinga to‘g‘ri kelmasligi mumkin. Hamma jamoa ham kuchayib boryapti. “Buxoro” palonchi-pistonchi futbolchilarni olib keldi, endi Superligaga chiqdi, degani emas. Maydonda o‘ynab isbotlash, g‘alaba qozonish va natija ko‘rsatish kerak. Buning tagida futbolchilarning og‘ir mehnati bor. Futbolchilar murabbiyni murabbiy qiladi. Murabbiy faqat yo‘l ko‘rsatib, o‘yinchilarni tanlaydi. Qolganini ularni o‘zlari bajarishadi. Ularga hech qanday e’tirozim yo‘q. Futbolchilarning mehnati bilan mart oyining eng yaxshi murabbiyi bo‘ldim, buni o‘zlariga ham aytdim. Hozirgi muborak Ramazon oyida hech kimdan, hech qanday xafagarchiligim yo‘q.

- Voqealar rivojini tahlil qilsak, hech yo‘g‘i bitta o‘yinda qoqilishingizni kutishgandek...

- Balki. Yana bilmadim, hammasi Allohga ayon. “Sho‘rtan” bilan uchrashuvdan keyin aytgan gaplarim ham balki kimlargadir yoqmagandir. Boya aytganimdek, muborak Ramazon oyining haqqi-hurmati hech kimdan xafa emasman. Agar kimnidir xafa qilib qo‘ygan bo‘lsam, uzr so‘radim. Kim pul to‘lasa, o‘sha musiqaga buyurtma beradi. Lekin men “Buxoro” ustidan yozuv-chizuv qilmayman. Jamoaga omad tilayman va Superligaga chiqsa xursand bo‘laman.

- Endi rejalaringiz qanday?

- Bunday vaziyatda murabbiyga og‘ir. Nima qilishga o‘ylanib ham qolasan ekan, kishi. Kamida 1 hafta, 10 kun dam olib, qilgan ishlarimni tahlil qilaman. Murabbiyning kasbi shunday. Jamoa yutadi, murabbiy yutqazadi. Baribir futbolchilarni tarbiyalashda davom etaman. Qo‘l tushirish niyatim yo‘q. Lekin Buxoroda katta niyatlar bilan ishni boshlagandim. Ammo peshonaga shunday yozilgan bo‘lsa, shu holaticha qabul qilaman. Meni futbol olamidagi insonlar qanday murabbiy va qanaqa xarakterga egaligimni yaxshi bilishadi. Siz jurnalistlar ham bilasizlar. Murabbiylarga baho berasizlar, ishini tahlil qilasizlar. Ha, xarakterim biroz og‘ir. Agar ishlasam sidqidildan mehnat qilaman. Yuzaki ishlamayman. Jamoa bir yilda tuzilmaydi. Masalan, AGMKni olaylik. Hozirgi darajaga etib kelishiga qancha vaqt ketdi? AGMK rahbarlari murabbiyga ishonch bildirishdi. Muvaffaqiyatsiz o‘yinlardan keyin bosh murabbiyni ishdan bo‘shatishgani yo‘q. “Paxtakor”da Arveladze ham boshida qiynalgan. Murabbiy bilan kelishdimi, unga tuzilgan shartnoma muddati bo‘yicha imkoniyat va sharoit qilib berishi kerak. Agar “Buxoro”ning yuksalishi uchun mening ketishim bo‘yicha qaror qabul qilishgan bo‘lsa, unda xursandman.