Buxoroda gandbol bo‘yicha O‘zbekiston kubogi musobaqasi o‘tkazilmoqda

Buxoro Olimpiya va paralimpiya sport turlariga tayyorlash markazida gandbol bo‘yicha o‘smirlar va o‘smir qizlar (U-14) o‘rtasida O‘zbekiston kubogi musobaqasining rasmiy ochilish marosimi bo‘lib o‘tdi.

Mazkur musobaqada respublikamizning barcha hududlaridan tashrif buyurgan jamoalar g‘oliblik uchun o‘zaro bellashmoqda. Tantanali ochilish marosimi doirasida ko‘rgazmali chiqishlar hamda san’atkorlar tomonidan taqdim etilgan musiqiy dasturlar musobaqaga o‘zgacha ruh bag‘ishladi.

Ayni paytda musobaqaning bellashuvlari qizg‘in va murosasiz bahslar ostida davom etmoqda. Ushbu musobaqa yosh sportchilarning mahoratini oshirish, gandbol sport turini yanada rivojlantirish hamda iqtidorli sportchilarni aniqlashda muhim ahamiyat kasb etadi.