Dana Uayt: "Shon Striklend qachon mamnun bo‘lgan?!"

UFC rahbari Dana Uayt amaldagi shartnoma shartlarini qayta ko‘rib chiqmasdan oktagonga chiqishdan bosh tortayotgan amaldagi chempion Shon Striklend joriy yilning may oyida liga bilan yangi shartnoma imzolagani haqidagi ma’lumotni tasdiqladi.

"Yo‘q, shaxsan men u bilan gaplashmaganman. Bu haqida faqat ijtimoiy tarmoqlar va boshqa manbalardan eshitdim. Lekin Shon oxirgi marta qachon biror narsadan mamnun bo‘lgan?! Striklend faqat may oyida yangi shartnoma imzoladi.

Atigi to‘rt-besh oy oldin u yangi shartnoma tuzdi. Eshitishimcha, u aytgan summa haqiqatga to‘g‘ri kelmaydi. Agar u bir yoki ikki yil bir xil shartnomada bo‘lganida, vaziyat boshqacha kechardi. Ammo Shon may oyida to‘liq yangilangan shartnomaga ega bo‘ldi", - dedi Uayt matbuot anjumanida.

Eslatib o‘tamiz, Striklend shu yilning dekabr oyida Nassurdin Imamovga qarshi chempionlik kamarini himoya qilishi rejalashtirilgan edi, biroq chempionning yangi moliyaviy talablar tufayli jang bo‘yicha muzokaralar boshi berk ko‘chaga kirib qoldi.