Ektor Kuper kuzatayotgan Germaniyadagi futbolchimiz Manuel Yantser

1992 yil 7 mart kuni Manuel Yantser Germaniyaning Alen shahrida tug‘ilgan. 178 sm bo‘yga ega, yarim himoyachi, Germaniya fuqarosi va hozirda Germaniya uchinchi divizionida ishtirok etuvchi "Ayntraxt" (Braunshveyg) klubi a’zosi.

Yantserning otasi tomondan kelib chiqishi o‘zbekistonlik ekanligini aytib o‘tgan. U 2007 yildan 2010 yilgacha Germaniyaning o‘smirlar terma jamoalarida o‘ynagan (U-16), (U-17), (U-18). Ushbu terma jamoadagi faoliyati davomida Yantser, 21 ta uchrashuvda maydonga tushib, 3 ta gol urishga erishgan. 2009 yili 17 yoshgacha bo‘lgan o‘smirlar o‘rtasidagi Evropa chempionatida g‘oliblikka erishgan va turnirning guruh bosqichida Gollandiya darvozasini ishg‘ol etgan.

Faoliyatini "Oberkoxen" yoshlar jamoasida boshlagan. 2010-2011 yilgi mavsumlarda "Shtutgart" yoshlari tarkibida o‘ynagan. 2011 yildan 2014 yilgacha "Shtutgart-2" klubi asosiy tarkibida maydonga tushgan va 94 ta uchrashuvda qatnashib 15 ta gol urgan. 2014-2015 yillarda "Xaydenxaym" jamoasida 10 ta bahsni o‘tqazdi. 2015 yildan 2018 yilgacha "Xolshtayn" klubi a’zosi sifatida 38 ta o‘yinda o‘ynab, 7 ta gol urgan. 2018 yildan boshlab "Ayntraxt" (Braunshveyg) tarkibida o‘ynab kelmoqda.

Ektor Kuper matbuot anjumanlarining birida Germaniya 3 divizionidagi futbolchimizni kuzatayotganligini ta’kidlab o‘tgan edi. Ajab emas, Yantser termamiz safida paydo bo‘lsa.