Fayzullaevdan xushxabar kutyapmiz!
Rossiya Premer-ligasi hal qiluvchi pallaga kirdi. Chempionat tashkilotchisi hisoblangan Premer-liga rahbariyati mavsum qahramonlarini aniqlash ishlarini olib bormoqda.
O‘tgan yilning avgustida “Paxtakor”dan TsSKAga ko‘chib o‘tgan Abbosbek Fayzullaev legioner sifatida ilk mavsumini o‘tkazayotgan bo‘lsa-da, eng zo‘r futbolchilar qatorida zikr etilmoqda.
Rossiya Premer-ligasi “Yil o‘yinchisi” nominatsiyasi bo‘yicha final bosqichiga chiqqan o‘n nafar eng kuchli futbolchi ro‘yxatini e’lon qildi. Quvonarli tomoni shundaki, 20 yoshli legionerimiz ham nufuzli sovringa da’vogarlik qilmoqda.
Ikkinchi marotaba o‘tkazilayotgan tanlovning bu yilgi g‘olibi quyidagi futbolchilar orasidan aniqlanadi:
Konstantin Tyukavin (“Dinamo”);
Eduard Spertsyan (“Krasnodar”);
Maksim Glushenkov (“Lokomotiv”);
Mateo Kasserra (“Zenit”);
Abbosbek Fayzullaev (TsSKA);
Srdjan Babich (“Spartak”);
Evgeniy Latishonok (“Baltika”);
Aleksandr Maksimenko (“Spartak”);
Irakliy Kvekveskiri (“Fakel”);
Jon Kordoba (“Krasnodar”).
Bundan tashqari, Abbosbek Fayzullaev yana bir nominatsiya – “Mavsum kashfiyoti” yo‘nalishi bo‘yicha ham g‘oliblikka asosiy da’vogarlardan biriga aylandi.
Hamyurtimiz “Dinamo” vakili Bitello va “Krilya Sovetov” o‘yinchisi Nikita Saltikov bilan yakuniy bosqichga chiqdi va mana shu uch futbolchidan biri mavsum kashfiyoti sifatda e’tirof etiladi.
Ta’kidlash joizki, Abbosbek Fayzullaev tanlovning birinchi bosqichida muxlislar bergan ovozlarga ko‘ra, eng ko‘p ko‘rsatkich bilan birinchi o‘ringa ko‘tarildi.
Tanlov g‘olibi murabbiylar, jamoa sardorlari, sharhlovchilar va mamlakat futbol faxriylaridan iborat maxsus hay’at tomonidan aniqlanadi.
G‘oliblar 26 may kuni taqdirlanadi.
Fikrlar