Ҳусановнинг ортидан яна бир футболчи “Ланс”га боради
Ўтган йили ёзда Франция чемпионатининг кучли жамоаларидан бири “Ланс” ўзбек футболчиси Абдуқодир Ҳусановни ўз таркибига қўшиб олган эди.
Бу трансфер бир неча жиҳатдан тарихий бўлди.
Биринчидан, Абдуқодир кучли бешлик чемпионатлари қаторида тилга олинадиган Франция чемпионатида ўйнаган биринчи ўзбек футболчисига айланди.
Иккинчидан, Ҳусанов "Энергетик-БГУ" вакили сифатида Беларусь олий лигасидан Францияга йўл олган биринчи ўйинчи сифатида Беларусь футболи тарихига ҳам ўз номини ёздириб қўйди.
Учинчидан, жорий мавсумда 20 ёшли марказий ҳимоячимиз УЕФА Чемпионлар лигаси гуруҳ босқичи ва Европа Лигасида иштирок этган ўзбекистонлик ягона ўйинчи сифатида қайд этилди.
“Ланс”нинг бу қарори ўзини оқлади. Абдуқодир Ҳусанов Лига 1 учрашувларида юқори савияда ўйнади. Европа Чемпионлар лигаси ва Европа Лигасида иккитадан ўйинда қатнашди.
20 ёшли ҳимоячимиз Беларусь чемпионатида пишган футболчилар ҳам кучли лигаларда ўйнаб кета олишини исботлади.
Буни инобатга олиб, “Ланс” мутасаддилари Беларусь чемпионатидан яна бир ёш ҳимоячини трансфер қиладиган бўлди. Бу гал лансликлар БАТЭ жамоасининг сенегаллик легионери Сиди Бейнни танлади.
Франция клуби африкалик 20 ёшли марказий ҳимоячига 2028 йилнинг ярмигача давом этадиган шартнома таклиф қилмоқда. Бу трансфер тахминан 300 минг евро атрофида баҳоланяпти.
Foot Mercato нашрининг ёзишича, “Ланс”нинг узоқ муддатли кузатувида скаутларда яхши таассурот қолдирган Сиди Бейннинг ўзи ҳам “Ланс” чорловини қабул қилган ва тез орада жамоа билан шартнома тузишга умид қилмоқда.
Сиди Бейн Беларусь чемпионатига 2022 йилнинг апрелида Сенегалнинг “USP Goureye” клубидан кўчиб ўтган.
Иқтидорли ҳимоячи Беларуснинг ички мусобақалари ва Европа майдонидаги халқаро турнирларда жами 46 мартоба майдонга тушиб, ўз ҳисобига бешта гол ёздириб қўйди.
Фикрлар