Hamidjon Aktamov: "To‘g‘ri, ikki ochko yo‘qotdik, ammo kutilmagan joydan qaytarib olamiz"

Superliganing uchinchi turida Navoiyning “Qizilqum” klubi o‘z maydonida “So‘g‘diyona”ni qabul qilib 1:1 hisobida durang o‘ynadi. Uchrashuvdan keyin o‘tkazilgan matbuot anjumanida mezbonlar ustozi Hamidjon Aktamov o‘z fikrlarini bildirdi.

- Bugungi o‘yinda futbolchilarimiz yaxshi o‘yin ko‘rsatishdi va ko‘rsatmalarni a’lo darajada bajarishdi. Faqat omad yuz o‘girdi. O‘yinni nazorat qildik, faqat etarlicha gol ura olmadik. O‘yindan-o‘yinga qo‘shib boryapmiz. To‘g‘ri, bugun ikki ochko yo‘qotdik. Ammo kutilmagan joydan qaytarib olamiz, Xudo xohlasa. Bu – futbol. Bugungi durangdan rozi emasman, yutishimiz kerak edi. “So‘g‘diyona” ham yaxshi himoyalandi, o‘yini chakki emas. Baribir bizning o‘yinimiz ularnikiga nisbatan yaxshiroq chiqdi, deb o‘ylayman.

- Raqibdan shunday qarshilik kutganmidingiz?

- Ha, kutgandik, bilardik. Hujumlar uyushtirdik. Ularning darvozaboni 100 foizli gollardan saqlab qoldi.

- Vattsazdeda ikkita qulay imkoniyat bo‘lgandi, ammo foydalana olmadi. Bu haqida nima deya olasiz?

- Mate ham gol deb o‘yladi. Bahona qilmoqchi emasman. Yaxshi futbol o‘ynadi. Tomoshabinlar ham xursand bo‘ldi deb o‘ylayman. Jamoamiz shakllanib borayotganidan xursandman. Oldinda o‘yinlar ko‘p va yo‘qotilgan ochkolarning o‘rnini to‘ldiramiz.

- Kuxianidzening uchta turdagi o‘yiniga qanday baho berasiz?

- U ham o‘z ishini qilyapti. Vazifasi ko‘proq qora ishni bajaradi. Shuning uchun uni yaqqol etakchi yoki o‘zini ko‘rsatdi, deb ayta olmayman. Futbolni tushunadi va o‘z ishini bajaryapti.