Javohir Sindarov Muxiddin Madaminov g‘alabasiga munosabat bildirdi

O‘zbekistonlik grossmeyster Javohir Sindarov Toshkentda o‘tgan UzChess Cup musobaqasida g‘olib chiqqan Muhiddin Madaminov haqida fikr bildirdi, deya xabar bermoqda Sports.kz.
 

Sindarov hamyurtining so‘nggi yillardagi tezkor o‘sishini alohida qayd etib, uning hayotidan qiziqarli bir tafsilotni ham esga oldi.
 

«U juda kuchli o‘ynadi. Hammaning o‘ziga ayon: Muhiddin partiyaning debut bosqichida qay darajada kuchli ekaniga. U bilan birga ishlaganimiz ham unga yordam bergan, deb o‘ylayman. Lekin yana bir juda qiziq jihat bor: Muhiddin shaxmatni o‘ynashni o‘n yoshdan boshlagan. Bizda hatto shunday suratlar borki, men allaqachon grossmeysterman, u esa mening muxlisim. Men bir vaqtning o‘zida bir nechta raqibga qarshi ko‘rgazmali o‘yin o‘tkazyapman, u esa tomoshabinlar orasida turibdi», — deydi Sindarov.
 

Uning ta’kidlashicha, bunday kech boshlangan karera Madaminovning yutuqlarini yanada hayratlanarli qiladi.
 

«Bu haqiqiy mo‘jiza. Muhiddin o‘n yoshda shaxmatga kirib kelgan. Oddiy holatda, agar sen o‘n besh yoshgacha grossmeyster bo‘lmasang, seni alohida iste’dod sifatida ko‘rishmaydi. Lekin u juda ko‘p mehnat qildi, o‘z qobiliyatini ochdi va hali ham meni hayratda qoldirishda davom etyapti. Odamlar hali-hanuz uning qay darajada kuchli ekanini to‘liq anglab etgani yo‘q», — deya qo‘shimcha qildi u.
 

Eslatib o‘tamiz, Muhiddin Madaminov Toshkentda o‘tkazilgan nufuzli UzChess Cup turnirida 9 imkoniyatdan 5,5 ochko to‘plab, birinchilikni qo‘lga kiritdi. Qo‘shimcha ko‘rsatkichlar bo‘yicha u hamyurti Shamsiddin Vohidov va rossiyalik grossmeyster Yan Nepomnyashchiyni ortda qoldirdi.