Mbappening qarzi PSJga tinchlik bermayapti

Yevropa Chempionlar ligasi va Frantsiya chempionatining amaldagi g‘olibi “Pari Sen-Jermen” klubi Kilian Mbappe bilan bo‘lgan sud mojarosida yana majburiy ijro choralariga duch kelishi mumkin. Sud tomonidan 60 million evrodan ortiq to‘lovni amalga oshirish majburiyati yuklatilganiga qaramay, futbolchi tomonining ta’kidlashicha, hali ham 2 million evro to‘lanmay qolgan. Hozirda “Real Madrid” hujumchisining yuridik jamoasi qolgan mablag‘ni majburiy undirish bo‘yicha ish olib bormoqda.

PSJ va Mbappe o‘rtasidagi mojaro 2025 yilning dekabr oyidagi sud qaroridan so‘ng yanada keskinlashdi. Klub qarzning asosiy qismini to‘lgan bo‘lsa-da, 2 million evrolik tafovut sabab Mbappening advokatlari yana sud ijrochilarini klub ma’muriy ofislariga yuborish bilan tahdid qilmoqda.

Nizo Parij sanoat sudi qaroridan kelib chiqqan bo‘lib, sud PSJni futbolchiga jami 60 million evro to‘lashga majbur qilgan. Ushbu summa to‘lanmagan maoshlar, imzo bonuslari va foizlarni o‘z ichiga oladi. PSJ dastlab 55 million evroni to‘lgan, keyinchalik ijro organlari aralashuvidan so‘ng yana 4 million evro qo‘shgan, biroq yakuniy 2 million evro hanuz to‘lanmagan.

Shu bilan birga, klub o‘z majburiyatlarini to‘liq bajarganini ta’kidlamoqda. Ularga ko‘ra, farq soliq va ijtimoiy sug‘urta badallari bilan bog‘liq texnik masalalardan kelib chiqqan.

Bu moliyaviy tortishuv PSJ uchun jamoatchilik oldidagi obro‘ masalasiga aylangan. Xabarlarga ko‘ra, klub sud qarorining to‘liq matnini rasmiy sayti bosh sahifasida bir oy davomida e’lon qilish majburiyatidan qochish uchun Mbappe bilan kelishuvga erishishga urinmoqda.

Mbappening tomoni esa na 2 million evrodan, na e’lon majburiyatidan voz kechishga tayyor emas.

Sud qarorining moliyaviy tafsilotlari

Sud Mbappening oylik yalpi maoshini 11,8 million evro deb belgiladi. Qarorga ko‘ra:

• 36,6 million evro — imzo bonusining uchinchi qismi;

• 3,6 million evro — ta’til puli;

• 17,2 million evro — 2024 yil aprel, may va iyun oylar uchun maosh;

• 1,7 million evro — shu davr uchun ta’til puli;

• 1,5 million evro — “etika bonusi”;

• 150 ming evro — unga bog‘liq ta’til to‘lovi;

• 5 ming evro — sud xarajatlari.

Sud PSJning Mbappe 2023 yilda tarkibdan chetlatilganda bonuslardan voz kechgan degan da’volarini rad etdi. Bu qaror futbolchi foydasiga chiqarilgan ikkinchi mustaqil hukm bo‘ldi.