Osiyo oʻyinlari-2026: Medallar jadvalida Oʻzbekistonning oʻrni oʻzgardi
O‘zbekiston terma jamoasi Aichi va Nagoya shaharlarida (Yaponiya) o‘tayotgan Osiyo o‘yinlari-2026ning 14-kunidan so‘ng umumjamoa medallar hisobida bir pog‘ona pasayib, to‘rtinchi o‘rindan beshinchi o‘ringa tushdi.
Hozircha O‘zbekiston jamoasi hisobida jami 70ta medal bor: 21ta oltin, 25ta kumush va 24ta bronza. To‘rtinchi o‘ringa esa 85ta medal qo‘lga kiritgan Hindiston ko‘tarildi. Ushbu jamoa ham 21ta oltinga ega, ammo kumush medallar soni ko‘proq — 27ta (bronza — 37ta). Oltin medallar soni bir xil bo‘lgani uchun Hindiston kumush medallar ustunligi hisobiga O‘zbekistonni ortda qoldirdi.
3 oktyabr kuni o‘zbekistonlik sportchilar jami beshta medal qo‘lga kiritishdi: bitta oltin, ikkita kumush va ikkita bronza.
Umumiy hisobdagi navbatdagi oltin medalni badiiy gimnastika bo‘yicha ko‘pkurash musobaqasida 112,950 ball natija qayd etgan Takhmina Ikromova yutib oldi. Shu tariqa u Osiyo o‘yinlarining uch karra chempioniga aylandi.
Kumush medallarni erkin kurashchi, 97 kilogrammgacha vazn toifasida bellashgan Sherzod Poyonov hamda 80 kilogrammdan yuqori vaznda ishtirok etgan taekvondoçi Marat Mavlonov qo‘lga kiritishdi.
Bronza medallari taekvondo bo‘yicha 67 kilogrammdan yuqori vazn toifasida maydonga tushgan Svetlana Saidova va aralash jamoaviy bellashuvlarda Janubiy Koreyani 4:2 hisobida mag‘lub etgan dzyudo terma jamoasiga nasib etdi.
Bir kun avval, ya’ni 2 oktyabr holatiga ko‘ra, O‘zbekiston 65ta medal bilan to‘rtinchi o‘rinni egalab turgan edi. Yaponiyadagi Osiyo o‘yinlari 4 oktyabr kuni o‘z nihoyasiga yetadi.
Fikrlar