Ronaldu 1000 ta gol uroladimi? Krishtianu aniq javob berdi

“An-Nasr” va Portugaliya terma jamoasi hujumchisi Krishtianu Ronaldu rasmiy uchrashuvlarda eng ko‘p to‘p kiritgan futbolchi hisoblanadi. Yaqinda 38 yoshli forvard to‘purarlik borasidagi rejalari bilan o‘rtoqlashdi.

- Biz “Portu” prezidenti Pinto da Koshta bilan gaplashib qoldik va u menga gollarim sonini 1000 taga etkazishga urinib ko‘rishimni taklif qildi.

Minglik dovonga etgunimcha, avval 900 ta gol urishim kerak. 900 ta gol ura olishimga aminman, lekin to‘plarni mingtaga etkazish uchun ancha to‘siqlarni engib o‘tishga to‘g‘ri keladi.

Hayotim va faoliyatimda shunday voqealar ro‘y berdiki, qisqa muddatli rejalarga asosan ish ko‘rishimga to‘g‘ri kelyapti. Hozircha, tanam yuklamalarni yaxshi ko‘taryapti va men klub va terma jamoa uchun o‘ynab, gol urishda davom etyapman, - dedi Krishtianu Ronaldu.

Ronaldu klublar miqyosida jami 979 ta uchrashuv o‘tkazib, 726 ta gol urgan va 231 ta assist qayd etgan.

Portugaliya terma jamoasida tajribali hujumchi 202 marotaba maydonga tushib, 125 ta gol va 44 ta assist muallifi bo‘ldi.