Ruslan Yakubov O‘zbekiston greppling terma jamoasi bosh murabbiyi bo‘ldi

Xabaringiz bor, yurtimizda pankration va greppling assotsiatsiyasi tashkil etildi. Qolaversa, assotsiatsiya ilk urinishdayoq jahon chempionatini O‘zbekistonda o‘tkazilishini ta’minladi.

Hozirga kelib, ushbu sport turlarini yurtimizda yanada rivojlantirish uchun jadal sur’atlarda ishlar olib borilmoqda. Zero, oldinda Butunjahon yakkakurash o‘yinlari, Osiyo chempionati kabi nufuzli musobaqalar bor. Yaqindagina pankration bo‘yicha terma jamoa bosh murabbiyligiga Dmitriy Xudyakov tayinlangan edi.

Kuni kecha assotsiatsiya raisi Hojiakbar Hakimov boshchiligidagi delegatsiya Buka GYM zaliga tashrif buyurdi. Tashrifdan maqsad ushbu sport zalida yoshlarga grepplingdan saboq beruvchi Ruslan Yakubovning mashg‘ulotlarini bevosita kuzatish barobarida unga greppling terma jamoasi bosh murabbiyligidek mas’uliyatli vazifani topshirish bo‘ldi. Shu tariqa Ruslan Renatovich Yakubov O‘zbekiston greppling terma jamoasi bosh murabbiyi lavozimida faoliyat yuritadigan bo‘ldi. O‘z o‘rnida unga ushbu muhim faoliyatida omad tilaymiz!