Шомуродов дубль қайд этган ўйинидан сўнг нималар деди?

Туркия Суперлигасининг 29-туридан ўрин олган баҳсда “Истанбул Башакшеҳир” ўз майдонида “Генчлербирлиги”ни 3:0 ҳисобида мағлуб этди.

Учрашувдан сўнг икки гол муаллифи бўлган Элдор Шомуродов ўз фикрлари билан ўртоқлашди.

“Мен гол уришимни кутган эдим, лекин аввал ҳам айтганимдек, мен учун энг муҳими — жамоанинг ғалаба қозониши. Бу ғалаба биз учун жуда муҳим эди, чунки биз Европа кубоклари йўлланмаси учун курашяпмиз. Бугун ўйинни яхши бошладик ва ўзимизни яхши ҳис қиляпмиз. Олдимизда яна 5 та муҳим учрашув бор.

Бугун биринчи бўлимда жуда яхши ҳаракат қилдик. Рақиб ҳимоясида кўплаб бўш жойлар ва позициялар топдик, шунинг учун ҳам голлар урилди. Бундан кейин ҳам мақсадимиз Европа лигасига йўл олиш”, — деди Шомуродов.

Маълумот учун, ҳужумчи тўпурарлар пойгасида 18 та гол билан иккинчи ўринда бормоқда.