Shaxmat. O‘zbekiston terma jamoasi ikki po‘g‘ona yuqoriladi

FIDE tomonidan sentabr oyi uchun yangilangan federatsiyalar reytingi e’lon qilindi. Unga ko‘ra, O‘zbekiston erkaklar terma jamoasi jahonning eng kuchli federatsiyalari orasida yana ikki pog‘ona yuqorilab, 6-o‘rindan joy oldi.

Avgust oyidagi reytingda O‘zbekiston 8-o‘rinni egallagan edi. Yangi reytingda esa terma jamoamiz o‘z pozitsiyasini yaxshilab, birdaniga ikki pog‘ona ko‘tarildi.

Ayni paytda O‘zbekistonning TOP-10 shohmatchisining o‘rtacha reytingi 2628 ballni tashkil etmoqda.

Jahonning eng kuchli federatsiyalari

Sentabr oyi reytingida O‘zbekiston dunyoning eng kuchli shohmat federatsiyalari qatorida qayd etildi. Terma jamoamizning ushbu natijasi mamlakatimizda shohmat sporti so‘nggi yillarda jadal rivojlanayotganini yana bir bor ko‘rsatmoqda.

O‘zbekistonlik shohmatchilar xalqaro musobaqalarda muntazam ravishda yuqori natijalar qayd etib, mamlakatning jahon reytingidagi mavqeini mustahkamlab kelmoqda.

Ayniqsa, yosh shohmatchilarning katta sahnaga kirib kelayotgani terma jamoaning umumiy salohiyati ortib borayotganidan dalolat bermoqda.

Shu tariqa, O‘zbekiston erkaklar terma jamoasi avgust oyidagi 8-o‘rindan sentabr oyida 6-pog‘onaga ko‘tarildi.

Eslatib o‘tamiz, FIDE federatsiyalar reytingi shohmatchilarning reyting ko‘rsatkichlari asosida shakllantiriladi.