Shomurodovning “Kalyari”dagi debyuti qanday baholandi?

A Seriyada birinchi tur uchrashuvlari yakunlandi. O‘nta uchrashuvdan atigi ikkitasida g‘olib aniqlanmadi.

Nihoyat, A Seriya debyutanti “Kalyari” ham chempionatni boshlab oldi. Turinda “Torino” mehmoni bo‘lgan Klaudio Raneri shogirdlari bir ochko egasi bo‘ldi. Bu bahs birinchi turda tomoshabinlar gol ko‘rmagan yagona uchrashuv bo‘ldi.

Mutaxassislar debyutant jamoa uchun “Torino” kabi kuchli jamoa maydonidan durang bilan qaytishni ijobiy natija sifatida qayd etmoqda.

O‘zbekistonlik futbol muxlislari uchun ahamiyatlisi esa, Eldor Shomurodov Sardiniya klubida A Seriyada debyut qilgani bo‘ldi.

Klaudio Raneri hali sport formasini to‘liq tiklab ulgurmagan o‘zbekistonlik legionerni 62-daqiqada zaxiradan maydonga tushirdi.

Uchrashuv tahlili bilan shug‘ullanayotgan manbalar, xususan, https://www.calciomercato.com sayti “Kalyari” futbolchilarining harakatlarini baholab chiqdi.

Boris Radunovich 6,5:

Har doim shay holatda turdi. Sanabriyaning zarbasidan keyin superseyv namoyish qildi.

Eduardo Goldaniga 5,5:

Himoyada mustahkm o‘ynashga harakat qildi. Biroq, raqib futbolchilaridan Karamox tezkor o‘yini bilan uni ancha qiynab qo‘ydi.

Allesandro Di Pardo 6:

Ikkinchi bo‘lim boshida Goldaniganing o‘rniga maydonga tushib, ancha faol o‘ynadi. Hujum uyushtirishda o‘zini ko‘rsata oldi.

Alberto Dossena 6.5:

Raqibning asosiy figuralaridan hisoblangan Sanabriyani o‘yindan chiqara oldi. Debyut uchrashuvida zo‘r o‘ynadi.

Adam Obert 6:

“Torino” hujumchisi Radonichga hech qanday imkoniyat qoldirmadi. Himoyani yaxshi boshqara oldi.

Gabriele Dzappa 5.5:

Tezkorlik etishmadi. Bundan tashqari, hujum uyushtirishda biroz sust o‘ynadi.

Ibrohim Sulemana 6.5:

Legioner futbolchi o‘zini ko‘rsata oldi. A Seriya bosimini engib o‘tdi va o‘zini yo‘qotib qo‘ymadi.

Antuan Makumbu 6:

Sulemana bilan birgalikda maydon markazida ancha faol va samarali o‘ynadi. Himoyalanishda ham ishonchli harakat qildi.

Paulo Azzi 6:

Himoyalanishda o‘zini ko‘rsatdi. Bir necha marotaba xavli hujum uyushtirishga urinib ko‘rdi.

Naytan Nandes 6:

Gollar hisobini ochishga yaqin keldi. Bir necha marotaba jamoadoshlariga qulay to‘p oshirishni uddaladi. Yanada kuchliroq o‘ynashga salohiyati etadi.

Leandro Pavoletti 6:

Nandesning o‘rniga maydonga tushgan tajribali hujumchi bu gal ancha faol o‘ynadi.

Zito Luvumbo 5.5:

Oldingi chiziqda xavfli vaziyatlar yarata olmadi. Shu boiz, 62-daqiqada o‘rnini Eldor Shomurodovga bo‘shatib berdi.

Eldor Shomurodov 5.5:

To‘pni jamoasida saqlab qolishga urinishlari bilan e’tiborni qozondi. Bir necha vaziyatda jamoadoshlarini hujumga chiqarish uchun aniq pas bera oldi.

Gaetano Oristanio 6.5:

Bu futbolchi har jabhada o‘zini ko‘rsata oldi. Eng zo‘r o‘yinchi bo‘lishi uchun bitta gol etishmadi xolos.

Yakub Yankto 6:

Bu futbolchi gol urishga juda yaqin kelgandi. Ancha faolligi bilan ajralib turdi.

Klaudio Raneri 6:

Kutilmagan qarorlari bilan ko‘pchilikni hayratga soldi. U amalga oshirgan o‘zgartirishlar “Kalyari”ning o‘yinini kuchaytirdi. Safar uchrashuvidan ochko olib qaytdi.

Bu futbolchiga Evropada kamida Shomurodovning yo‘lini bersin, deyishmoqda!