Shunchaki kosmos: Ronalduning Instagram sahifasidagi bitta posti qancha turadi?

Krishtianu Ronaldu nafaqat maydonda to‘p tepib, ijtimoiy tarmoqlarda ham “soqqa qilish”ning hadisini olgan sportchi hisoblanadi.

Futboldagi muvaffaqiyatlari orqali virtual olamda ham o‘ta katta auditoriya to‘plagan futbolchi bu sohada pul topishda ustasifarang.

Sportbible nashrining ma’lum qilishicha, Krishtianu Ronaldu vakillari Saudiya Arabistonining “Mobily” telekommunikatsiya kompaniyasi bilan 4,5 soatlik hamkorlik uchun bir million evroga hisob bergan.  

Bir million uchun Ronaldu suratga tushib beradi, beshta futbolkani imzolaydi va ijtimoiy tarmoqlarda buyurtmachining nomini ikki marotaba tilga oladi xolos.

Undan ham zo‘ri – Ronalduning Instagram sahifasidagi bitta reklama posti 3 million evro turadi. Bu butun insoniyat tarixidagi eng katta narx sifatida qayd etilgan.

Bundan tashqari, Sportlobster kompaniyasi portugaliyalik to‘purar bilan hamkorlik shartnomasini imzolagan va unga ko‘ra, Ronaldu 300 ming evro evaziga ijtimoiy tarmoqlarda bu kompaniya nomini bir necha bor yoritib beradi.