Каннаваро Ўзбекистон терма жамоасини нега танлаганини айтди

Ўзбекистон терма жамоаси бош мураббийи Фабио Каннаваро "Prime Video Sport IT" YouTube каналига берган интервьюсида жамоага келиши жараёни ва қарор қабул қилиш сабаблари ҳақида гапирди.

"Жамоада аввал мураббий бор эди — Катанец. Лекин охирги тўртта ўйин қолганда унда соғлиқ билан боғлиқ муаммо пайдо бўлди ва у лавозимини тарк этди. Кейин маҳаллий мураббий жамоани қабул қилди ва улар саралаш босқичидан муваффақиятли ўтишди. Шундан кейин федерация жамоани хорижлик мураббийга топширишга қарор қилди", — деди Каннаваро.

У Ўзбекистонга аввал “афсоналар ўйини”да иштирок этиш учун келганини, шу орқали мамлакат футболи муҳитини бироз ўрганганини таъкидлади.

"Мен Ўзбекистонга аввал “афсоналар ўйини”да қатнашиш учун келганман. Шу вақтда муҳитни бироз билиб олгандим. У ерда вице-президент бор — у собиқ халқаро ҳакам. Мен у билан гаплашдим. Орадан 15–20 кун ўтиб, у менга қўнғироқ қилди ва мен билан учрашмоқчи бўлди. Мен дарҳол рози бўлдим", — деди у.

Каннаваро, шунингдек, таклиф қабул қилиш жараёнида молиявий масалалар муҳокама қилинмаганини алоҳида қайд этди.

"Мен у билан пул ҳақида ҳам, бошқа шартлар ҳақида ҳам гаплашмадим. Мен фақат шуни айтдим: Жаҳон чемпионатига чиқиш — бу биз учун, буни бошдан кечирганлар учун аллақачон катта совға", — дея сўзини якунлади мураббий.