Tomas Tuxel: “Bizga yordam kerak”

Xabaringiz bor, so‘nggi turda “Bavariya” o‘z uyida “Kyoln”ni qabul qiladi. “Borussiya” esa, “Maynts”ni. Dortmundliklar o‘z o‘yinida g‘alaba qozonsa, Germaniya chempioniga aylanadi. Myunhenning “Bavariya” klubi bosh murabbiyi – Tomas Tuxel Bundesliga chempionligi borasida fikr bildirdi.

“Vaziyat barchaga birdek tushunarli. Biz o‘z o‘yinimizni yutishimiz, keyin narigi bahsdagi voqeani kuzatishimizga to‘g‘ri keladi.

Ko‘p xato qilganimiz uchun ham hozir mana shu ahvolga tushib qoldik. 100 foiz aybni o‘z bo‘ynimga olaman. Jamoani qabul qilganimdan beri mashg‘ulotlar o‘tkazyapmiz. Shunday ekan, natija uchun ham men javob beraman.”