Xavi: Mana shu shaxs Messi “Barselona”ga qaytishiga yo‘l qo‘ymadi!
2022 yildgi jahon chempionatida Argentina terma jamoasi tarkibida g‘alaba qozonganidan keyin Lionel Messi “Barselona”ga qaytishga juda yaqin kelgan edi, ammo kelishuv oxirgi daqiqada barbod bo‘ldi.
La Vanguardia gazetasiga bergan intervyusida “Barselona”ning sobiq bosh murabbiyi Xavi Ernandes Messining 2023 yilda “Kamp Nou”ga qaytishi deyarli kafolatlanganini aytdi.
- Messining jahon chempionatida g‘alaba qozonganidan keyin “Barselona”ga qaytishi deyarli hal bo‘lgan masala edi. Hamma narsa haqiqatan ham tayyor edi. La Liga ham bu transferga yashil chiroq yoqqan edi, - deydi Xavi Ernandes.
Xavining aytishicha, Messining o‘zi ham 20 yildan ortiq vaqt o‘tkazgan va klub tarixidagi eng buyuk ramzga aylangan sobiq jamoasiga qaytishni juda istagan.
Biroq oxir-oqibat bu kelishuvni klub prezidenti Joan Laporta barbod qilgan.
Xavining ta’kidlashicha, Laporta Messining qaytishi jamoadagi maoshlar tuzilmasida jiddiy muammolar keltirib chiqarishidan xavotir olgan.
- Laporta menga bu holat kiyinish xonasida maoshlar bo‘yicha haqiqiy urushni keltirib chiqarishi mumkinligini aytdi va u bunga yo‘l qo‘ya olmasligini bildirdi, - dedi Xavi.
Bu qaror Messi va “Barselona”ning qayta birlashish orzusini yo‘q qildi. Shundan keyin argentinalik superyulduz 2023 yil yozida MLS ligasidagi “Inter Mayami” klubiga qo‘shilishga qaror qildi.
Fikrlar