Xet-trik haqida: "Harakat qildim, barakasini Xudo berdi, bayramni cho‘zib bo‘lmasdi" yoxud "Andijon" to‘purari Shahboz Erkinov 2-o‘rin kimga nasib qilishi haqida nima deydi?

“Andijon” pro ligada muddatidan oldin 1-o‘rinni egallab, musobaqa g‘olibligini qo‘lga kiritdi va shu bilan birga Superliga masalasini naqd qilib qo‘ydi. Xullas, “Burgutlar” o‘z oldiga qo‘yilgan vazifani sharaf bilan uddaladilar. Ayniqsa, bunda jamoaning tajribali hujumchisi Shahboz Erkinovning hissasi katta bo‘ldi.

Bu yil 36 yoshni qarshilagan futbolchi “Andijon”ga kelib o‘zining ikkinchi yoshligini eslab qoldi, ishonavering! Hujumchi pro ligada shu kungacha 12 ta, Kubok bahslarida 3 ta gol urdi. Demak, umumiy hisobda hozirgacha 15 ta golni hisobiga yozdirib qo‘ydi.

Solishtirish uchun aytamizki, Erkinov o‘tgan yili “Bunyodkor” safida Superligada 20 ta o‘yinda 2 ta gol urgandi. Bu yil bo‘lsa, to‘purarlik salohiyatini namoyish etib, hali ham avvalgidek gollarga chanqoqligini isbotladi.

Pro liganing 24-turida “Andijon” “Mash’al”ni qabul qilib 4:2 hisobida mag‘lubiyatga uchratdi. O‘sha o‘yinda Shahboz Erkinov xet-trikka erishdi. Shundan so‘ng hujumchi qator masalalarda munosabatini aytdi.

“Mash’al” bilan uchrashuvda jamoada bosim bormidi?

- Bosim bo‘lgani yo‘q, yutishimiz kerakligini bilardik. Undan avval “Turon”ni mag‘lub eta olmadik. Keyin bitta turga g‘oliblik bayrami cho‘zildi. “Mash’al” bilan uchrashuvning boshlanishida, ayniqsa darvozamizdan ikkita gol o‘tkazib yuborganimiz uchun ozgina sarosima bo‘ldi. Bayramni bunchalik cho‘zib bo‘lmasdi. Shuning uchun tanaffus chog‘ida futbolchilar bilan gaplashib oldik, ikkinchi bo‘limga xotirjam chiqdik. Xudoga shukr, muxlislar oldida yuzimiz yorug‘ bo‘ldi. Ishqibozlarimiz ancha jiddiy tayyorgarlik ko‘rishgan ekan. Maydonda shunga yarasha ularga munosib javob bermaganimizda uyat bo‘lardi. His-hayajon yoki bosim bo‘lgani yo‘q. Mavsum tugayapti, mana shunday paytda shu kabi narsalarni bo‘lishi menimcha uyat ham bo‘lsa kerak. Qolaversa, oldimizga qo‘yilgan vazifani bajarib bo‘lgandik. Boshqa paytga nisbatan bu safar o‘ynash osonroq bo‘lardi. Oldimizdagi 4 ta uchrashuvdan 1 tasida yutsak kifoya edi. Shuning hisobiga hech qanaqa bosim bo‘lmadi. Faqat uyimizda yutqazishga haqqimiz yo‘q edi.

Xet-trikka erishishini o‘ylaganmidi?

- 3 ta gol urishimni kutmagandim. Biroq har qanday futbolchi va ayniqsa hujumchi gol urishga intiladi. O‘yin chog‘ida buning uchun bor kuchi bilan harakat qiladi. Xet-trikka erishishimni kutmaganligimni aytdim. Chunki o‘yinni yomon boshlagandik. Eng asosiysi, jamoamga yordamim tegsa bo‘ldi. Hisob 2:2 va 3:2 bo‘lganidan keyin ancha engil tortdik. Aynan shuncha gol uraman deb maqsad qilmagandim. Harakat qildim, barakasini Xudo berdi.

Viktor Kumikovning diskvalifikatsiya tufayli maydon chetida emasligi jamoaga qanchalik bilinyapti?

- Bosh murabbiy maydon chetida bo‘lsa, o‘sha onlarda jamoaga kerakli so‘zlarni aytib turadi. Masalan, standart usullarimiz kam emas. Shu sababli ana shunday paytlarda murabbiy futbolchilarga tegishli ko‘rsatmalarni berib turadi. Shuning uchun standartlar bajarilishidan oldin kim nima qilishi kerakligi yoki qaysi usulni qo‘llash lozimligini aytadi. Bosh murabbiyning maydon chetida bo‘lmayotgani katta ta’sir qilgani yo‘q. Chunki bir yildan beri deyarli bir xil tarkib bilan o‘ynayapmiz. Qaerda va nima qilish kerakligini bilamiz. Barcha futbolchi maydondagi funktsiyasini biladi. Baribir bosh murabbiyning maydon chetida turgani bizga, ayniqsa yoshlarga dalda bo‘lib turadi va ko‘rsatmalari bilan yordam beradi.

Vazifani bajarib bo‘lgan “Andijon” endi qolgan o‘yinlar uchun qaerdan motivatsiya oladi?

- Qolgan uchta o‘yin masalasi bo‘yicha motivatsiyani aytmoqchisiz-da, buni biz futbolchilar emas, murabbiylar shtabi hal qiladi. Bizga hali dam berib, ta’tilga chiqarib yuborishgani yo‘q. Balki biroz ta’tilga chiqarmiz deb o‘ylagandik, ammo Viktor Balyutovich yo‘q dedi va uch kundan keyin “Buxoro” bilan uchrashuvga tayyorlanamiz, deb aytdi. Shundan bildimki, demak qolgan o‘yinlarda ham maksimal darajada o‘ynaymiz. Endi qanday tarkib bilan o‘ynaymiz, yoshlarga imkoniyat beradimi yoki aralash tarkib bilanmi, bulardan xabarimiz yo‘q. Barchasini murabbiylar shtabi hal qiladi. Baribir o‘ynaganimizda keyin motivatsiya bo‘ladi.

Unutilmas o‘yin qaysi?

- Hamma uchrashuvni o‘ziga yarasha qiyinchiliklari bo‘ldi. Pro liga bo‘lgani bilan oson o‘yinlar bo‘lgani yo‘q. Qaytanga pastdagi jamoalar bilan uchrashuvlarda ko‘proq qiynaldik. Baribir menimcha, bu holat ruhiyatga bog‘liq bo‘lsa kerak. Shu sababli ruhiy tayyorgarlik ham balki boshqacharoq bo‘lgandir. Shuning evaziga bo‘lsa kerak, pastdagi jamoalar bilan bahslarda yaxshigina qiynaldik. Maqsadi bor raqiblar bilan uchrashuvlarda tabiiyki, oson bo‘lgani yo‘q. Hamma uchrashuvning o‘ziga yarasha qiyinchiligi bo‘ldi. Qiziqarli, esda qolarli o‘yinlar sifatida hamma shuni aytsa kerak, muxlislar ham – oxirgi daqiqalarda gol urib yutib ketgan o‘yinlarimiz. Ayniqsa, ketma-ket uchta uchrashuvda 90-daqiqadan keyin gol urib yutgan bellashuvlarimizni ayta olaman. Shu o‘yinlar ancha esda qolarli bo‘ldi.

2-o‘rin kimga nasib qiladi?

- Menimcha, oxirgi turgacha kurashishadi. 1 noyabr kuni bu klublar Buxoroda o‘ynashadi va ko‘p narsa shunga bog‘liq. Aynan “Buxoro” – “Turon” uchrashuvining natijasiga ko‘p narsa bog‘liq bo‘ladi. Bashorat qilishni yoqtirmayman. Lekin oxirgi turgacha hammani o‘ziga yarasha qaynoq holatda ushlab turadi. Qiziq bo‘ladi, albatta. “Buxoro” ancha pastda edi, endi ochkolarni jamg‘arib “Turon”ga etib oldi. O‘z o‘yinlari bilan imkoniyatini tiklab oldi. Ammo kimni Superligaga chiqishini ayta olmayman. 21 noyabr kuni bilamiz.      

Shuhratbek Jo‘raev.