"Yuventus" va "Milan" hujumchilar almashinuvini amalga oshirmoqchi

"Yuventus" Dushan Vlaxovichni jamoada saqlab qolishni rejalashtirmayapti.

"TuttoSport" nashrining xabar berishicha, Turin klubi yaxshi taklif kelgan taqdirda hujumchini sotishni mo‘ljallamoqda.

Serbiyalik futbolchining yangi jamoasi "Milan" bo‘lishi mumkin. "Rossoneri" bosh murabbiyi Massimiliano Allegri ilgari Vlaxovich bilan ishlagan bo‘lib, uni birinchi raqamli maqsad sifatida ko‘rmoqda.

Ta’kidlanishicha, tomonlar transfer ustida faol ish olib bormoqda va unga teng qiymatli o‘yinchini kiritish masalasini ko‘rib chiqmoqda. Masalan, Aleksis Salemakers "Yuventus"ga yoqadi, ammo ayni paytda Allegrining ham jamoadagi sevimli futbolchilaridan biri hisoblanadi.

Transferdagi asosiy muammo sifatida Vlaxovich agentining maosh talablarini pasaytirishni xohlamasligi ko‘rsatilmoqda.