Артета: "Саутгемптон"ни табриклайман, энди жамоа характерини кўрсатиши шарт"

“Арсенал” бош мураббийи Микель Артета “Саутгемптон”дан 1:2 ҳисобидаги мағлубият ва Англия Кубогидан чиқиб кетишга муносабат билдирди.

"Аввало, “Саутгемптон”ни табриклаш керак, улар “Уэмбли”га йўл олди, биз эса йўқ.

Бизда жуда яхши имкониятлар бўлди, аммо улардан фойдалана олмадик. Ўтказиб юборган голларимиз эса бизнинг даражамизга мос келмайди. Айнан шу сабаб мағлуб бўлдик.

Узун узатмаларга қарши тўғри ҳаракат қила олмадик, бу жуда ғалати ҳолат. Биринчи бўлимда тўп ҳимоя чизиғимиз орасидан ўтиб кетишига йўл қўйдик ва рақиб бирга-бир вазиятга чиқди. Иккинчи гол ҳам деярли шу тарзда ўтказиб юборилди. Буни изоҳлаш жуда қийин. Аммо рақибга муносиб баҳо бериш керак.

Мавсум турли босқичлардан иборат, айрим даврлар турли сабабларга кўра бошқаларига нисбатан қийинроқ кечади. Қатор иккита кўнгилсиз натижа қайд этдик ва энди ўзимизни қўлга олишимиз керак. Айнан ҳозир жамоа қандай характерга эга эканини кўрсатиши лозим. Майдондаги ўйинимиз ўз сўзини айтиши шарт", — деди Артета BBC’га берган интервьюсида.