"Барселона" жамоасида ўйин услубини ўзгартириш масаласи кўтарилди

"Барселона" бош мураббийи Ханс-Дитер Флик жамоанинг сўнгги икки мағлубияти ортидан футболчилар билан узоқ суҳбат ўтказди. Бу ҳақда Sport.es нашри хабар берди.

Манбага кўра, футболчиларнинг жамоавий таҳлили кўп жиҳатдан немис мутахассисининг фикрлари билан мос келган. Суҳбат давомида ўтган мавсумда самарали ишлаган айрим ўйин концепциялари жорий мавсумда амалга ошириш учун мураккаб бўлаётгани тан олинган.

Флик ва мураббийлар штаби футболчиларнинг муносабатидан мамнун бўлган. Жамоа аъзолари ўтган мавсумдаги ўйин тамойилларига қайтиш тарафдори эканини тасдиқлаб, сўнгги учрашувларда юқори суръат ва фаол прессингдан бироз чекинганларини ҳам эътироф этган.