Бу клубга адашиб келгансан, бизга ўт!

Англия Премьер-лигасининг кучли жамоаларидан ҳисобланган “Тоттенхэм” бу мавсум инқирозга юз тутди ва қуйи лигага йўл очадиган хавфли зонага тушиб қолди.

Экспертларнинг таъкидлашича, агар жамоа Премьер-лигадан чиқиб кетса, бир қатор етакчи ўйинчиларини йўқотади. Европа клублари жамоа атрофидаги вазиятни кузатиб бормоқда ва кучли футболчиларга кўз тикиб турибди.

Хусусан, “Тоттенхэм”нинг ҳужумкор ярим ҳимоячиси Хави Симонс Лондон клубига ўтганидан атиги бир йил ўтиб, жамоасини ўзгартириши мумкин.

“Шпорлар” тушиб қолган вазиятдан келиб чиқиб, Симонснинг ҳам жамоадаги келажаги мавҳум бўлиб турибди.

Журналист Экрем Конурнинг X ижтимоий тармоғидаги маълумотига кўра, нидерландиялик футболчини “Арсенал”, “Бавария” ва унинг собиқ клуби “Пари Сен-Жермен” сотиб олишга қизиқмоқда.

Трансфер суммаси 50 миллион евродан ошиши мумкин. Хави Симонс ўтган йил август ойида “РБ Лейпциг”дан “Тоттенхэм”га 65 миллион эвазига ўтган эди. Жорий мавсумда ярим ҳимоячи барча мусобақаларда 42 та ўйин ўтказиб, олтита гол ва еттита голли узатма қайд этди.