Энцо Фернандеснинг агенти мижозининг "Челси"даги келажагига ойдинлик киритди

“Челси” ярим ҳимоячиси Энцо Фернандеснинг агенти Хавьер Пасторе футболчининг шартномасини узайтириш борасидаги музокаралар ҳақида фикр билдирди. Унинг сўзларига кўра, томонлар ўртасида келишувга эришилмаган.

“Шартномани узайтириш бўйича музокаралар бўлди. Биз тахминан декабрь ёки январь ойларида мулоқотни бошладик, аммо келишувга эриша олмадик. Энцонинг амалдаги шартномаси яна олти йилга мўлжаллангани учун уни узайтирмасликка қарор қилдик. Чунки таклиф этилган шартлар на бизга, на футболчининг ўзига мос келди.”

Агент футболчининг ҳозирги даражасига алоҳида урғу берди:

“Энцонинг бугунги даражасини инобатга олсак, у ҳозир олаётган маошидан анча кўпроғинига лойиқ. Аммо клуб бу масалада етарлича реал ёндашмади.”

Шунингдек, у музокаралар вақтинча тўхтатилганини таъкидлади:

“Ҳозир жамоа олдида муҳим вазифалар бор — хусусан, Чемпионлар лигасига чиқиш. Шунинг учун барча эътиборни ўйинларга қаратдик. Жаҳон чемпионатидан сўнг яна музокара столига қайтамиз. Агар келишувга эришилмаса, бошқа вариантларни ҳам кўриб чиқамиз.”