Гаттузо Италия терма жамоасини тарк этади

Италия миллий терма жамоаси бош мураббийи Женнаро Гаттузо жамоани тарк этади. Бу ҳақда машҳур инсайдер Фабрицио Романо хабар берди. Қарор жамоанинг 2026 йилги жаҳон чемпионатига йўлланма ола олмаганидан кейин қабул қилинди.

Сешанба куни жамоа Босния ва Герцеговинага қарши плей-офф финалида 1:1 ҳисобида дуранг ўйнади. Пенальтилар сериясида эса рақиб 4:1 ҳисобида устун келиб, Италияни мундиал йўлланмасидан маҳрум қилди. Шу тариқа италияликлар кетма-кет учинчи марта жаҳон чемпионатини ўтказиб юборади.

Гаттузо Италия терма жамоасини 2025 йил июнь ойидан буён бошқариб келаётган эди. Унинг амалдаги шартномаси 2026 йил июлига қадар мўлжалланган бўлса-да, муваффақиятсиз натижадан кейин томонлар ҳамкорликни тўхтатишга қарор қилди.