Роналду бир гол билан иккита “даҳшатли” рекорд ўрнатди

41 ёшли Криштиану Роналду Саудия Арабистони футболи тарихини қайта ёзишда давом этмоқда.

Саудия Арабистони Профессионал лигасининг 28-турида португалиялик юлдуз етакчилигидаги “Ан-Наср” футболчилари сафарда “Ал-Ухдуд” жамоасига қарши майдонга тушди.

Учрашувнинг 15-дақиқасида Криштиану Роналду гол уриб, жамоасини ҳисобда олдинга олиб чиқди ва бу гол унинг “Ан-Наср”даги жами 124-голи бўлди. Шу тариқа, Роналду клуб тарихида энг кўп гол урган рекордчига айланди.

Аввалги рекорд Муҳаммад Ас-Сахлавийга тегишли бўлиб, бу футболчи 123 та гол билан “А-Наср” тарихидаги энг зўр тўпурар бўлиб турган эди. Буёғига эса, ундан ўзиб кетган Роналду “Ан-Наср”нинг 68 йиллик тарихида энг сермаҳсул ўйинчи саналадиган бўлди.

Бундан ташқари, португалиялик футбол афсонаси профессионал фаолиятидаги умумий голлари сонини 968 тага етказди ва ўзининг “даҳшатли” рекордини яна янгилади. Футбол жамоатчилиги Роналду қачон минглик маррадан ўтишини кутмоқда.

Эслатиб ўтамиз, “Ан-Наср”га келишидан олдин Криштиану Роналду Европада “Спортинг”, “Манчестер Юнайтед”, “Реал Мадрид” ва “Ювентус” каби гранд жамоаларида ўйнаган.