Терма жамоадан чақирув олмаган топ футболчилар

Яхши биласиз, бу ҳафта ФИФА кунлари бўлиб ўтади. Яъни , терма жамоалар ўз ўйинларини ўтказишади. Ушбу ўйинлар учун терма жамоалар мураббийлари аллақачон чақирув олган футболчилар рўйҳатини эълон қилишган. Эътиборлиси, шундай машҳур ва ажойиб формада бўлган футболчилар борки, улар терма жамоага жалб этилишмади. Қуйида шундай футболчилар ҳақида ҳикоя қиламиз.

Маркос Алонсо

Маркос бу мавсум АПЛда 23 та ўйинда иштирок тишга улгурди ва бунча ўйинда испаниялик футболчи 4 та гол киритиб, икки бор шерикларини голли узатма билан та`минлади. АПЛда пешқадамлик қилаётган клубинг асосий футболчиси терма жамоага чақирилмади. Шахсий кўрсаткичлари нисбатан паст бўлган Начо Монреаль эса терма жамоадан чақирув олди.

Хуан Мата

Испания терма жамоасининг 25 талик рўйҳатидан Витоло, Деулофеу ва Аспасларга жой топилди. Аммо Матага бу ерда жой топилмади. Тўғри, юқорида санаб ўтилган футболчилар ажойиб формада. Жумладан, Аспас бу мавсум жуда яхши тўп суришмоқда. Бироқ уларнинг ҳеч бирини Матадан устун кўрмаган бўлар эдим, бу шахсий фикрим албатта. Испания термаси бош мураббийи Хулен Лопотеги эса Матани Исроил ва Францияга қарши беллашувларга жалб этгани йўқ.

Сеск Фабгрегас

Ха, Фабрегаснинг 25 таликка киритилмагани балки, мантиқан тўғридир, Чунки, Сеск “Челси”да асосан заҳирадан ўйинга қўшилмоқда ва ўйин амалиёти бироз кам. Испания термасида эса марказда ўйнайдиган футболчилар талайгина.

Тео Уолкотт

“Арсенал”нинг ҳужумкор ярим ҳимоячиси бўлган Уолкотт сўнгги бир ой давомида 3 та тўп киритишга муваффақ бўлди. Албатта бу голлар “Саттон”, “Линкольн” ва ҳеч нарсани англатмаган “Бавария”га киритилган голлар эди, холос. Инглизлар бош мураббийи Гарри Саутгейт эса Теони термага жалб этиладиган даражада эмас деб топди.

Клаудио Маркизио

Маркизио жароҳатидан сўнг “Ювентус” таркибидан кўп ҳам жой олаётгани йўқ ва бу қарор ҳам қайсидир маънода тўғридир. Бироқ Италия термаси бош мураббийи  Вентура “скуадра адзурра”га хаттоки, Б Сериядан ҳам футболчиларни жалб этгани…

Александр Ляказетт

“Лион”нинг форварди бу мавсум Франция чемпионатида 23 та гол кириришга улгурди. Фаранглар устози Дидье Дешам эса “Лондонда зериккан” Пайетни, “Арсенал” заҳирасида ўтирадиган Жируларни термага жалб этди. Аммо Ляказетт бундан мустасно.

Мауро Икарди

Аргентиналиклар устози Эдгардо Бауса Икардининг термага жалб этилмаганининг сабаби сифатида – Мауро жамоавий ўйинчи эмаслигини кўрсатиб ўтди. А Серияда 20 та гол киритиб, 8 бор шерикларини голли узатма билан таъминлаган Икарди қолиб, жаноб Бауса Хитойда сўнгги бир йилда бирорта гол киритмаган Лавессини ва Бразилия чемпионатида ўртамиёна ўйин кўрсатаётган Лукас Праттони термага жалб этди.

Бонус

Фозил Мусаев

Мусаев айни вақтда Осиёнинг энг кучли лигаларидан саналган J лигада тўп сураётганидан хабарингиз бор. Тўғри, Фозил у қадар кучли бўлмаган “Жубило Ивата”да тўп сураётган бўлиши мумкин. Аммо у мунтазам жамоасининг асосий таркибидан жой эгаллаб келмоқда ва хаттоки, J лига 2-турининг рамзий термасидан жой эгаллади. Аммо Самвел Бабаян Мусаевни терма жамоага жалб этмади. Бизнинг ярим ҳимоя чизиғимиз доимо, кучли футболчилардан ташкил топиб келганини яхши биламиз. Аммо “Бунёдкор”даги Отабек Шукуровни бугунги кунда Мусаевдан устун кўрмаган бўлар эдим, бу ҳам шахсий фикр.

Ps: Ушбу рўйҳатга Икер Касильяс, Марсель Шмелцерларни ҳам киритишим мумкин эди. Аммо қўпол қилиб айтганда уларнинг “даври ўтди”.

Тавсия этамиз: 

Шаҳзод Холбоев тайёрлади

Фикрлар

Саралаш
Фикр қолдириш учун авторизациядан ўтинг!