Легионерларимиз дам олиш кунлари қандай ўйнашди?

20 март, 14:54 456

Яхши биласиз биз ҳар ҳафта аввалида хорижда тўп сураётган легионерларимиз ҳақида маълумот бериб бормоқдамиз. Бугун ҳам ушбу анъанага содиқ қолган холда, дам олиш кунлари бўлиб ўтган ўйинларда легионерларимиз қандай ўйнашгани ҳақида маълумот берамиз.

Россия

Россия Премьер-лигаси 20-турида Ўзбекистон терма жамоаси аъзоси Вадим Афонин тўп сураётган “Оренбург” клуби сафарда “Анжи” меҳмони бўлди. Мазкур учрашувла Александр Прудников томонидан киритилган ягона гол “Анжи”га 3 очко келтирди. Ўзбекистон терма жамоаси аъзоси 90 дақиқа тўлиқ ўйнади. Мазкур ўйиндан кейин “Оренбург” 16 очко билан 13-поғонани эгаллаб турибди.

20-турда Москва дербиси ҳам бўлиб ўтди. Ўз майдонида турнир пешқадами бўлган “Спартак”ни қабул қилган “Локомотив” якунда рақиби билан муроса кўчасини танлади - 1:1. Ҳамюртимиз Виталий Денисов ўйинда москвалик “темирйўлчилар” сафида тўлиқ ҳаракат қилди. Аммо олинган маълумотларга кўра Денисов мазкур баҳсда жарохат олган ва терма билан Малайзияга бормаган. Витьяга эса муҳим ўйин олдидан саломатлик тилаб қоламиз.

Россия биринчи дивизионида 27-тур баҳслари бўлиб ўтди. Ушбу тур доирасида ҳамюртимиз Бобур Давлатов тўп сураётган “Нефтехимик” клуби ўз майдонида “Волгарь” жамоасини қабул қилди. Қизиқарли кечган учрашув эса мезбонлар ҳисобига 2:0 натижаси билан якунланди. Ўйинни асосий таркибда бошлаган Давлатов эса 5-дақиқадаёқ урилган голга ҳаммаллифлик қилди.

Шунингдек ушбу тур доирасида Вагиз Галиулин тўп сурувчи “Тосно” ҳам меҳмонда “Енисей”га қарши баҳс олиб борди ва бу ўйин ҳам ҳамюртимиз жамоасининг ғалабаси билан якунланди. Бироқ, бу ўйинда Галиулин захирада қолдирилди.Мазкур турдан сўнг, Давлатовнинг жамоаси турнир жадавалида 19, Галиулин тўп сурадиган “Тосно” эса 2-ўринни эгаллаб турибди.

Қозоғистон

Қозиғистон Премьер Лигаси 3-тур баҳслари ўз якунига етди. Ушбу тур доирасида Шавкат Саломов тўп сураётган “Атирау” ўз майдонида “Иртиш”ни қабул қилган бўлса, Александр Гейнрих тўп сурадиган Чимкентнинг “Ордабаси” жамоаси меҳмонда “Актобе” билан куч синашди. Ушбу баҳсларда Шавкат Саломов ўз жамоаси сафида асосий таркибда майдонга тушиб, тўлиқ 90 даиқа ҳаракат қилган бўлса, Александр Гейнрих ўйин қайдномасига ҳам киритилмади. Қайд этиш лозим, “Атирау” ўз майдонида “Иртиш”га 0:1 ҳисобида имкониятни бой бериб қўйган бўлса, “Ордабаси” меҳмонда худди шундай ҳисобда ғалабани қўлга киритди.

Айни вақтда Саломовнинг жамоаси жарима баллари туфайли турнир жадвалида сўнгги ўринни эгаллаб турган бўлса, Гейнрихнинг “Ордабаси” клуби 2-ўринда бормоқда.

Сербия

Ҳамюртимиз Ҳусниддин Ғофуров фаолият юритадиган “Явор” клуби Сербия Суперлигасининг 27-турида “Металац” жамоасини қабул қилди. Ғофуров 90 дақиқа ўйнаган мазкур беллашувда “Явор” рақибини минимал ҳисобда мағлубиятга учратди ва турнир жадвалида 7-ўринга кўтарилиб олди.

Япония

Фозил Мусаев тўп сурадиган “Жубило Ивата” жамоаси J лиганинг 4-турида “Виссел Кобе” меҳмони бўлди ва ортга 0:1 ҳисобидаги мағлубият билан қайтадиган бўлди. Э`тиборлиси, Самвел Бабаяннинг назарига тушмаган Мусаев ушбу баҳсда майдонда тўлиқ ҳаракатланди. Ушбу мағлубиятдан сўнг “Жубило Ивата” J лигада 18 жамоа орасида 11-ўринни эгаллаб турибди.

Шунингдек, ҳафта ўртасида J лига кубоги турнири ҳам бўлиб ўтди. Ўз майдонида “Консадоле Саппоро” жамоасини қабул қилган “Жубило” мазкур беллашувда рақибга 0:2 ҳисобида имкониятни бой беради. Ўйинни бошланғич таркибда бошлаган Мусаев 60-дақиқада заҳирага олинган эди, ўша баҳсда.

Жанубий Корея

Жанубий Кореяда нуфузи жиҳатдан иккинчи ўринда турадиган лигада фаолият юритадиган “Ансан Гринерс” жамоаси бу турда ўз майдонида “Анянг”ни қабул қилди. Ўйинда мезбонлар 1:0 ҳисобида зафар қучди. “Ансан” таркибида тўп сурадиган Баҳодир Насимов ўйинни асосий таркибда бошлаб, 84-дақиқада заҳирага олинди. Айни ватқда Насимов ва унинг жамоаси турнир жадвалида 10 жамоа орасида 5-ўринни эгаллаб турибди.

Тавсия этамиз: 

Шаҳзод Холбоев тайёрлади