Мбаппе: "Мен "Реал"да муваффақиятга эришаман"

"Реал Мадрид" футболчиси Килиан Мбаппе Франсиянинг Canal+ телеканалига катта интервю берди.

"Бу мавсумнинг бошланиши биз кутгандек эмас, лекин биз аҳамиятли совринларни ютишга тайёргарлик кўряпмиз. Биз аллақачон Европа Суперкубогини қўлга киритдик. Вазият биз кутганимиздан бошқачароқ, лекин "Реал" мавсумнинг иккинчи қисмида ўзини кўрсатади. Одамлар бизни шундан кейин баҳолашади.

Агар сен юлдуз бўлсанг, сен жим турсанг ҳам, бошқалар сен ҳақингда гапиради. Шу сабаб бугун ўзим гапиряпман. Ҳар куни бирор воқеа содир бўляпти, гарчи мен интервю бермаган бўлсам ҳам. Мен бу ҳақда ҳеч нарса демаганман. Бу, эҳтимол, Килиан ҳақида гапирилиши шарт бўлган нарсадек туюлади.

Мен илк бор Франсияни тарк этдим. Энди мен у ерда эмасман. Сиз учун янги муҳит, янги клуб, янги иқлим очилади. Ҳар бир нарсани янги ҳис-туйғулар билан қабул қиласиз. Бу кўпроқ кузатувга ўхшайди. Мен бу ерда муваффақиятга эришаман",-деди 25 ёшли ҳужумчи.