Андижон вилояти спорт бошқармаси бошлиғи: "Шахмат мусобақаси учун шароитлар юқори савияда ташкил этилган"
Сайтимиз орқали хабар берганимиздек, 13-20 январь кунлари Андижон шаҳридаги “Универсал “спорт мажмуасида 7 ёшдан 17 ёшгача бўлган мактаб ўқувчилари ўртасида шахмат бўйича Ўзбекистон чемпионатига старт берилди.
Уни юқори савияда ўтказиш, барча зарур шарт-шароитларни яратиш, ташкилотчилик масаласида ҳам ишлар кўнгилдагидек бўлиши учун вилоятда мазкур турнирга катта тайёргарлик кўрилди.
Андижон вилоят спорт бошқармаси бошлиғи Ўткирбек Одилжонович Тошпўлатов бу борада Sports.uz учун қуйидагиларни айтди:
- Ҳаммани хабари бор, кейинги йилларда юртимизда шахматга бўлган эътибор тубдан ўзгарган. 2022 йилги шахмат Олимпиадасида шахмат тожини юртимизга олиб келишган. Насиб қилса, келаси йили Самарқандда навбатдаги шахмат Олимпиадаси ўтказилади. Ушбу мусобақаларга юртимиздаги ёш спортчиларни тайёрлаш, кашф қилиш мақсадида бир нечта ёш тоифасида доимий равишда мусобақалар ўтказиб келинмоқда.
Жумладан, 13-20 январь кунлари умумий ўрта таълим мактабларининг ўқувчилари, яъни. 7-17 ёшлилар ўртасида Ўзбекистон чемпионатига Андижон шаҳридаги муҳташам “Универсал” спорт мажмуаси мезбонлик қиляпти. Мазкур мусобақа учун барча шарт-шароитлар юқори савияда ташкил этилган. Белгиланган талабларга асосан шахмат стол-стуллари, шахмат доналари янгитдан тайёрланди.
Кеча бутун Республикамиздан 1000 нафарга яқин ёш шахматчиларни тантанали кутиб олдик. Мана, 14 январдан старт берилди. Турнирда 840 нафар ёш шахматчилар қатнашмоқда. Мусобақа ғолиблари жаҳон миқёсида ўтказиладиган турнирларга йўлланмани қўлга киритадилар ва қимматбаҳо совғалар билан ҳам тақдирланадилар. Мана, илк кундан юқори савияда бошланди. Мана шу ердан келажакда жаҳон олимпиадалари, жаҳон чемпионларининг ғолиблари етишиб чиқади.
Албатта, вилоят ҳокими, вилоятимиз шахмат федерациясининг раиси ҳисобланади. Мусобақани юқори савияда ўтказиш учун ўзи бошчилигида ташкилий гуруҳ тузилган. Қарийб бир давомида мусобақага замонавий ва халқаро Олимпиадалар ўтказиладиган даражада тайёргарлик кўрилди. Ишонаманки, охиригача юқори савияда ўтказилади”, - дейди Ўткир Одилжонович Sports.uz сайтига.
Фикрлар