Клопп икки жамоа учун мураббийликка қайтишга кўнди

Испаниянинг амалдаги чемпиони “Реал” жамоасининг жорий мавсумдаги ўйини ва натижалари клуб мутасаддилари ва мухлисларини қониқтирмаяпти.

Айниқса, мадридликларнинг Европа Чемпионлар лигаси чорак финали ҳар икки учрашувида “Арсенал”га ҳеч қандай қаршилик кўрсата олмагани Карло Анчелоттининг клубдаги келажаги хавф остига қўйди.

“Қироллик клуби” италиялик мутахассис ўрнига бир неча номзодларни топиб қўйган ва уларни ҳамкорликка кўндиришга ҳаракат қилади.

Мадридликлар нишонидаги мураббийлардан бири “Ливерпуль”ни тарк этганидан кейин жамоа бошқаришдан танаффус олган Юрген Клоппдир.

Испаниянинг Sport ва Британиянинг The Express нашрларининг таъкидлашича, германиялик мутахассис “Реал” вакиллари билан бўлажак ҳамкорликни муҳокама қилишга очиқ.

Шунингдек, Юрген Клопп “Реал” билан келиша олмаган тақдирда Бразилия терма жамоаси билан ишлашга ҳам рози эканини билдирган. Бразилия футбол конфедерацияси терма жамоани Карло Анчелоттига топширмоқчи эди. Бироқ италиялик мутахассис айни пайтда “Реал” билан бандлигини рўкач қилиб, бу чорловни қабул қилмади.