Февзи Давлетов: "У ўзининг феноменал футболини намойиш қиляпти"

Суперлиганинг 6-туридан ўрин олган "Сурхон" - "Навбаҳор" ўртасидаги баҳсда мезбонлар 1:0 ҳисобида ғалаба қозонди. Учрашувдан сўнг мезбонлар бош мураббийи Февзи Давлетов ўйиндан кейинги матбуот анжуманида журналистларнинг саволларига жавоб берди

Ўйин ҳақида

- Менимча, биз жуда яхши ўйин ўтказдик. Икки жамоа ҳам яхши футбол намойиш қилди ва ғалаба учун ўйнади. Аммо биз бу ғалабага муносиб эдик. Таъкидлаш керакки, биринчи тайм ажойиб ўтди. Шунчаки, биз яратган вазиятларда гол уришимз керак эди. Иккинчи таймда эса ўйин охиригача шиддатли бўлди. Биз пенальтини ура олмадик, аммо ўйиндан гол ура олдик. Кирилл Колесниченко ўз хатосини тўғрилади ва чиройли гол урди. Ўйинчиларимни муносиб ғалаба билан табриклайман. Стадионга кўп мухлислар келди ва биз уларни хурсанд қилишимиз керак эди.

- Февзи Ризаэвич, ғалаба билан табриклаймиз. Мусобақа давомида жамоа тобора кучайиб бораётганини кузатяпмиз. Нега шундай бўляптики, “Сурхон” ўзининг энг яхши ўйинини мавсум бошиданоқ кўрсатмаяпти?

- Мавсум бошида таркиб бўйича муаммоларимиз бор эди. Ёшлар терма жамоасида ўйнаган футболчилар формага тушмаган эди. Муҳаммад-Али Абдураҳмонов тайёргарлик давридан сўнг ўз ўйинини топа олмаётганди. Ҳозир у ўзининг феноменал футболини намойиш қиляпти. Менимча, биз учун таҳлил қилишга сабаблар бор. Қилинган хатоларимиз ҳам йўқ эмас. Мавсум бошидаги омадсиз старт жамоани бироз синидирди. Лекин ҳозир жамоамиз яхшироқ ўйнаяпти. Менимча, бу ғалабалар бизга катта ишонч беради.

- Кўриниб турибдики, жамоа рақибни тўлиқ мағлуб этди. Ўзгаришларга қараб, сизнинг “Б режангиз”ни кўрдик, десак бўлади-ми?

- Биринчи таймда жуда кўп куч сарфладик. Бизнинг режамиз — тез гол уриш ва яратилган имкониятлардан фойдаланиш эди. Кейин эса ҳисобга қараб ўйнаш керак эди, чунки “Навбаҳор” жавоб зарбасини тез бериши мумкин эди. Иккинчи таймда эса футболчилар чарчаганлиги учун бир неча алмашинувларни амалга оширдик. Захирадан майдонга тушганлар эса ўйинни кучайтириши керак эди.

- Колесниченко пенальтидан гол ура олмаганда, сизда қандай ҳис-туйғулар бўлди?

- Кейинги сафар Евдоким пенальтини тепади (кулади).