Миржалол Қосимов жамоасининг 0:2 ни 3:2 га айлантиргани ҳақида нима дейди?

Ўзбекистон Кубоги доирасида ўтказиган ОКМК – “Насаф” (3:2) учрашувидан сўнг матбуот анжуманида мезбонлар бош мураббийи Миржалол Қосимов қуйидагиларни айтди:

“Ажойиб ўйинни гувоҳи бўлдик. Бундан авваламбор мухлислар ютди. “Насаф” ўтган йили чемпион бўлди. Жуда яхши, малакали ўйинчилари бор. Қолаверса, Черан қўшилди. Ўйин жуда ҳам муҳим эди. Нимагаки, бу Кубок баҳси эди. Жамоамиз ёмон ўйин кўрсатгани йўқ. Лекин футболда шундай нарса борки, айтиб ўтганимдек, рақибда малакали ўйинчилар йиғилган.

Биринчи ва иккинчи голларда оддий вазиятларда голга айлантириб кетишди. Учрашув жуда ҳам қизиқ ўтди. Футболчиларни кўзи “ёниб” турганди. Ўтган йили хатоимиз туфайли гуруҳдан чиқа олмагандик. Шунинг учун ҳаракат қилдик ва чиндан ҳам яхши ўйин кўрсатишди. 0:2 бўлишига қарамасдан, ўйинчилар руҳан тайёр эдилар.

Фурсатдан фойдаланиб, мухлисларимизга раҳмат. Аввалдан айтиб келганман, футбол мухлислар учун. Майдонга чиқдикми, биринчи навбатда ишқибозлар учун ҳаракат қилишимиз керак. Кейинги ўйинга тайёргарлик кўрамиз. Олдинда яна муҳим учрашувларимиз турибди”.