"7 та гол урамиз деб ўйламагандим, биз уни кўр-корона таклиф қилгандик" - Баҳром Ҳайдаров

Ўзбекистон Кубоги гуруҳ босқичида “Қўқон-1912” жамоаси сафарда Андижон футбол академияси жамоасига қарши баҳс олиб борди. Беллашувда қўқонликлар жавобсиз 7 та гол урган ҳолда ўта йирик ҳисобдаги ғалабани қўлга киритди. Учрашувдан сўнг “Қўқон-1912” бош мураббийи Баҳром Ҳайдаров саволларга жавоб қайтарди.

- Биринчи навбатда футболчиларимни ғалаба билан табриклайман. Умумий оладиган бўлсак, рақибимиз жуда ёш футболчилардан ташкил топган. Биринчи бўлимда қўрқмасдан ўйнаганлари мени қойил қолдирди. Барибир ёшдаги фарқ билинади. Биринчи бўлимда яхши таассурот қолдирди. Келажаги порлоқ йигитлар экани кўриниб турибди. Қўрқмасдан футбол ўйнашяпти. Фақат олдинга интилишяпти. Бундай учрашувларга “настрой” қилиш қийин. Йигитларимизга таъкидлаб ўтсак ҳам барибир шундай бўлиб туради. Рақиб биринчи бўлимда футболчиларимни қийнаб қўйди. Танаффусда қаттиқроқ гаплашдик ва иккинчи бўлимда тажриба ўз сўзини айтди. Қайд этилган ҳисоб асло рақибдан кучсизлигидан эмас. Фақат ёш фарқи бўлди.

- Биринчи тайм 0:0 билан якунланди. Иккинчи таймда эса 7 та гол урилиши камдан-кам учрайдиган ҳолат. Бундай бўлишини кутганмидингиз?

- Йирик ҳисоб бўлмаса ҳам ғалаба қозонишимизни хоҳлагандим. Тўғрисини айтсам, яширишни кераги йўқ, биринчи бўлимга қараганда, катта ҳисоб бўлиб кетишини кутмагандим. Уларни кучи етмай қолди. Бу жисмоний тарафлама ҳам билинди ва ёшлик фарқи ҳам сўзини айтди. 7 та тўп урамиз, деб ўйламагандим. Ҳеч бўлмаганда 2:0 ё 3:0...Рақиб ҳам балки гол уриши мумкин эди.

- Биринчи бўлимдан кейинги ўзгаришлар ҳам ўз сўзини айтди. Бахтиёр Қосимов, Егор Кондратюк каби футболчиларнинг майдонга тушиши ўйинни қанчалик ўзгартирди, деб ўйлайсиз?  

- Биринчи бўлимда майдонга тушганлар чемпионатда камроқ ўйин амалиётига эга бўлишаётганди. Шунинг учун уларга ўйин тонусига тушиб олишлиги учун имконият бергандик. Иккинчи бўлимда майдонга тушганлар ҳозирги кундаги асосий таркиб ўйинчиларимиз. Ўйин тонусида ҳам уларни фарқи билиниб қолди.

- Бундай ўта йирик ҳисобдан кейин Суперлиганинг навбатдаги ўйинига жамоангиз учун қанчалик мотивация беради, деб ҳисоблайсиз?

- Мотивация берса яхши. Буни ҳар хил томонлама тушуниш керак. Салбий тарафга ҳам, ижобий тарафга ҳам кетиб қолиши мумкин. Бунинг устида ишлаймиз ва гаплашамиз. Асосий мақсадимиз гуруҳдан чиқиш, аммо ҳозирча тўлиқ бу масалани ҳал қилиб олганимиз йўқ. Олдимизда турган “Хоразм”га қарши беллашув жуда масъулиятли ўйин. Уч очко учун ўйин бўлади. Жамоамиз ҳар тарафлама тайёр. Фақат руҳий жиҳатдан пухта тайёрлай олсак, ўйлайманки, ижобий натижа беради.

- Шунингдек, легионер ҳужумчи Кобенна билан шартнома бекор қилинди. Бунинг асосий сабаби нима билан боғлиқ?

- Унинг келишида жароҳати бор экан. Бир-иккита ўйинларда уни текшириб кўрмоқчи эдик, ўринбосарлар таркибида. Бироқ жароҳати билан боғлиқ ҳолат туфайли уни сифатли ўйинчими ёки йўқми, била олмадик. Биз шундай шартнома тузгандикки, бир ойча синов муддати билан келишув амалга оширилган.  Аммо синов муддатида биз унинг ўйинини кўра олмадик. Фақат машғулотларда кўрдик. Шунда ҳам у кўп жароҳат олди. Шу сабабли футболчи билан хайрлашишга тўғри келди.

- Унинг келиши трансфер хатоси бўлмадими?

- Бизга ҳужумчи жуда зарур эди. Қидирдик, охирида трансфер ойнаси ёпилаётганда вақт зиқ бўлиб қолганида биз у билан синов муддати билан шартнома тузишга мажбур бўлдик. Ҳар бир жамоада, ҳар бир мураббийда адашишлар бўлади. Биз уни кўр-кўрона таваккал қилиб олгандик. Бу ўзини оқламагани учун хайрлашдик.