"Реал" Конате учун ёзда 25 миллион фунтлик таклиф беришни режалаштирмоқда

"Реал Мадрид" ёзги трансфер ойнасида "Ливерпуль" ҳимоячиси Ибраима Конатени қўлга киритиш учун ҳаракат қилиши мумкин. Манбаларга кўра, испанияликлар франциялик марказий ҳимоячи учун 25 миллион фунт атрофида таклиф беришни режалаштирмоқда.

"Football Insider" нашридаги "Inside Track" подкастида иштирок этган мутахассис Пит О’Руркнинг таъкидлашича, 26 ёшли футболчининг жорий ёзда "Энфилд"ни тарк этиш эҳтимоли юқори.

Хаби Алонсо бошқараётган жамоа Конатега анчадан буён қизиқиш билдириб келади. Унинг шартномаси 2026 йилгача амал қилади ва "Реал" бу вазиятдан фойдаланиб, "Ливерпуль"га босим ўтказишни режалаштирмоқда.

Бироқ, "Football Insider" манбаси мерсесайдликлар Конате учун камида 40 миллион фунт талаб қилаётганини маълум қилди. Англияликлар ҳимоячини ёзда ҳам, кейинги мавсумда ҳам қўйиб юборишни истамайди.

Шу боис, "Реал" Конате билан шартнома тугашини кутиб, уни 2026 йилда эркин агент сифатида олиб келишни режа қилмоқда. Эслатиб ўтамиз, шунингдек, май ойида мазкур манба "Реал Мадрид" Александер-Арнольдни ҳам эркин агент сифатида қўшиб олганидан сўнг Конатега бўлган қизиқиш янада кучайганини маълум қилган эди.