Вадим Абрамов: "Ҳали трансфер ойнасидаги ишимизни тугатмадик"

Хабарингиз бор, айни пайтда Суперлига клублари иккинчи давра учун ёзги ўқув-машғулот йиғинларини олиб бормоқдалар. Самарқанднинг "Динамо" жамоаси Беларусда тайёргарлик жараёнларини олиб бормоқда.

Вадим Абрамов бошчилигидаги ушбу клуб ҳам селекция ишларини фаол олиб бормоқда ва таркиб керакли ижрочилар ҳисобига кучайтирилмоқда. 

Минскда йиғин ўтказаётган "Динамо" клуби бош мураббийи Вадим Абрамов Беларусдаги машғулотлар якунланиши арафасида клуб матбуот хизматига интервью берди.

"Мавсумнинг иккинчи қисмига тайёргарлик режа асосида ўтмоқда. Учта ўйиндан иккитасини ўтказдик. Бундай баҳсларда мен учун натижа муҳим эмас, асосийси тайёргарлик жараёнидир. Биринчисида "Славия"га ютқазган бўлсак-да, янги ўйинчиларни, турли ишланмаларни синаб кўрдик. Ўша куни майдон сифати яхши эмаслиги икки томоннинг ҳам ўйинига таъсир қилди. 

Иккинчи ўйинда эса асосий таркибга яқин бўлган 11 таликни дастлабки дақиқалардан синадик. Янги ўйинчилар тезроқ мослашиб олиши муҳим эди ва улар ҳам жамоада анча вақтдан буён тўп сураётгандек тезда киришиб кетаётгани мени хурсанд қилди. Ўзи яхши савиядаги ўйинчи учун мослашиш жараёни узоқ кечмайди.

Дебютантлар ўйинидан қониқяпман, умид қиламанки Суперлига ва Ўзбекистон кубогининг муҳим баҳсларига яхши тайёргарлик билан киришамиз. Жаҳонгир Ўрозов, Ойбек Ўрмонжонов ва Эдем Неманов терма жамоадан қайтишади. Футболчиларнинг олдиндаги учрашувларга жароҳатсиз етиб келиши муҳим. "Витебск"га қарши ўйиндан кейин 26 июль куни Ўзбекистонга қайтамиз ва "Навбаҳор" билан ўйинга сўнгги тайёргарликни Самарқандда ўтказамиз.

Таркибни кучайтириш ишлари? Ҳали трансфер ойнасидаги ишимизни тугатмадик – янги ўйинчилар учун ўрин бор. Номзодларни кўряпмиз, улар орасида легионерлар ҳам бор, аммо улар бизга тўғри келмаяпти. Ҳимоя чизиғини кучайтиришни режалаштирганмиз. Ҳали вақт бор, молиявий жиҳатдан ҳам, ўйин жиҳатдан ҳам талабларимизга мос ўйинчини топсак, ўз сафимизга қўшиб оламиз. Аммо Кожо мисолида ўйинчилар талаби юқори эканини кўриб турибсиз. Шундай экан, имкониятимиз ва ўйинимизга мос ўйинчини топсак, таклиф қиламиз», - деди Вадим Карленович клуб матбуот хизматига берган интервьюсида.